Алты алашқа аты әйгілі болған Домалақ ананы білмейтін жан кемде-кем. Ол туралы түрлі аңыздар мен дастандар жазылып, тарих беттері талай сыр шертті. Себебі ол – ел ұранына айналған абзал аналардың бірі. Оның шын есімі – Нұрила. Бірақ, өзгені баласындай көріп, төңірегіне аналық мейірімін шашқан, барынша кішіпейіл, айтар сөзі ақиқатқа айналған болжампаз, қадір-қасиетін құрметтеген ұрпақтары сол заманның өзінде-ақ оның атын атамай, «Домалақ ана» деп атап кеткен. Домалақ ана Жетісу, Әулиеата, Шымкент, Ташкенттің ғана емес, барша елдің анасы атанған. Содан болар, көгілдір экранда ол туралы көптеген сахналық, театрлық қойылымдар жиі қойылады. Бүгінде Домалақ ана жайлы пьесалардың қойылуы қазақ жұрты үшін үрдіске айналған. Осындай дәстүрдің үзігін жалғаған №148 мектеп ұжымы аналарға мерекелік көңіл-күй сыйлады.
Өткен аптада Халықаралық әйелдер күні мерекесіне орай №148 орта мектепте жазушы Шерхан Мұртазаның «Домалақ ана» пьессасы сахналанды. Аталған сахналық қойылым мектеп ұжымы, ардагер ұстаз аналарды және мекептегі мұғалімдердің аналарынының құрметіне өткізілді. Мектеп психологы Айнаш Бектұрғанованың ұйымдастыруымен өткен бұл қойылымда мұғалімдер «Домалақ ана» пьессасын өздері сахналап, залға жиналғандардың ерекше ықыласына бөленді. Жас маман Мөлдір Әлімханова Домалақ ананың жас кезінен қарт кезіне дейінгі бейнесін көрсете білді. Сондай-ақ С.Қожамжаров, М.Рахатов, Т.Қамалов сынды ұстаздарға ардақты аналар өз алғысын білдірді. Абзал анаға арналған пьесса мерекелік кешке ұласты. Көңілді кеште құлақ құрышын қандырар әндер айтылып, би биленді. Мерекелік бағдарлама аяқталған соң, мектеп директоры Орынкүл Шорабаева барша әйел аналарды келіп жеткен көктемнің шуақты мерекесімен құттықтай отырып, сахнаның сәнін келтіріп, өнер көрсеткен барша ұстаздарға алғысын білдірді. Сондай-ақ, мектеп ішінен шахмат үйірмесін ашып, балалардың бос уақытын тиімді пайдалануға мүмкіндік сыйлаған Айнаш Бектұрғанова мен үйірме қызметкері Қасымхан Айменовтың ісіне сәттілік тіледі.