Жуырда Өзбексатанның Ташкент қаласында ауыр атлетикадан 20 жасқа дейінгі жастар арасында өткен Әлем чемпионатында жерлесіміз Айсамал Сансызбаева алтыннан алқа тақты.
Ол 87 келіден жоғары салмақ дәрежесінде қарсыласқа шақ келтірмей, жеңістің жоғарғы тұғырынан көрінді. Жерлесіміз жұлқа көтеруден – 113, серпе көтеруден – 145, қос сайыс қорытындысы бойынша 258 келіні бағындырды.

Айта кетейік, Айсамал былтырғы жылы Ташкентте өткен Азия чемпионатында 2 мәрте алтын медаль алса, Перудың Лима қаласында жасөспірімдер арасындағы Әлем кубогының жеңімпазы атанған. Ол бүгінгі таңда, Ж.Баһадүр атындағы олимпиадалық резервтің облыстық мамандандырылған мектеп-интернат-колледжінде студент. Алтыннан алқа таққан Айсамалды Арман Абдраев, Нұрсұлтан Бахрадин, Мұхаммед Тұрысбеков сынды жаттықтырушылар бабына келтіріп шыңдауда.