Сейсенбі күні «Шиелі-Думан» серіктестігінде Сәрсенбек Баймағанбетовтің 65 жасқа толуына орай мерекелік кеш өтті. Кеште «Шиелі-Думан» қызметкерлері әннен шашу шашып, аспазшылар пісірген торттан дәм татқызды. Өмір жолынан естелік суреттер мен бейнеролик көрсетіліп, қатарластары өткен шақтың керемет кезеңдерін еске алды. Қызметтес әріптестері мен оңалту орталығындағы замандастары шапан кигізіп, балалары ізгі тілектерін білдірді. Кеш соңында Сәрсенбек Сәбекұлы қолына домбырасын алып, ән, термелерден, күйлерден сыр шертті.
Сәрсенбек Баймағанбетов Өзбекстанның Шыршық қаласында 1956 жылы 14 ақпанда дүниеге келген. Кейін 1959 жылы Қызылорда облысы, Шиелі ауданы, қазіргі Ақмая ауылына көшіп келеді. 1963-1973 жылдары Ақмаядағы №49 орта мектептің түлегі атанып, мектеп бітіргеннен кейін аудандық мәдениет үйінде автоклуб меңгерушісі қызметінде болды. 1976 жылдары Кеңес армиясында азаматтық борышын өтейді. Содан соң 1976-1986 жылдар аралығында қайтадан мәдениет үйінде жұмыс істейді. Алматыдағы ауыл шаруашылық институтының инженер-механик факультетіне оқуға түсуіне байланысты Шиелі ауданы ауыл шаруашылық мекемесіне ауысады. Онда технадзор, техника қауіпсіздігінің инженері, бас инженер болып 1997 жылға дейін қызмет атқарады. 1997-2004 жылдары Ақмая ЖШС-інде төраға, 2004-2019 жылдары №56 Шиелі жол дистанциясына кәсіподақ төрағасы болып зейнетке шығады.

Мәдениет бөлімінде қызмет атқарған жылдары республикалық, облыстық көркем өнерпаздар байқауларына қатысып, «Жігер» фестивалі, «Халық – талант қайнары» теле фестивалінің лауреаты атанған. 1978 жылы Қызылорда облысының «Қарақалпақстандағы он күндігі» концерттік бағдарламасының, республикалық телеарналардағы терме айту бағдарламасының қатысушысы. Қазақ телекөрмесінің алтын қорында Сәрсенбек Сәбекұлының орындауындағы 7 терме сақталған. 1985-1989 жылдары «Тамаша» ойын-сауық отауының концерттік кештерінде ән салған.