Ғалымдар мен дәрігерлер кеңесін тыңдасақ, адам баласы ештеңе ойламаса, бірдеңе оқымаса миы семіп, ойлау қабілеті, сөйлеу деңгейі төмендеп, санасы дамымай қалатын көрінеді. Атам қазақ жазуды, оқуды білмей тұрып-ақ, адамдардың психологиясын өздерінше сезіп, ондайларды «ой, санасыз!» деп ұрсып, жұртты бір-бірінен осылайша ажыратып отырған. Аудан айнасы «Өскен өңір» газетіне 7-ші сыныптан бері жазылып келемін. Бейне бір анам жұмысқа кетіп, кешке үйге оралғанда қандай қуансам, газетті дәл сондай көңіл-күйде сағына күтіп отырамын. Әрине, басқа да басылымдарға жазыламын, бірақ «Өскен өңірдің» жөні бөлек. Ерекше ыстық. Тартымды. Тақырыпқа бай. Ақпарат заманындағы көз ілеспес ақпарат легі дер кезінде басылым бетінде жарық көріп, ой-санамызды тәрбиелеп келеді. Бүгінде ұжымда жас, шебер журналистер тобы қызмет етеді. Олар аудан көлеміндегі қарапайым еңбекшіл халықтың ерен еңбегін, туған жеріміздің табиғатын, өндіріс орындары мен зауыттардың тыныс-тіршілігін, шаруа қожалықтарының жетістіктерін шолып, жұрттың әлеуметтік хал-ахуалын, білім саласы мен денсаулық мекемелерінің жай-күйін, әдебиетіміз, өнеріміз бен тіліміздің, салт-дәстүріміздің дамуын, жастарымыздың, кәсіпкерлеріміздің келбеті турасында, аудан әкімдігінің жобалары, атқарып жатқан жағымды жаңалықтарын жазып, көңілімізді шалқытуда.

Осы жерде айтарым, қазір басылымға келер жылға жазылу қарқынды жүріп жатыр. Менің оқырман ретінде байқағаным, соңғы 20 жылда аудандық газетімізге жазылатындар саны 5-6 мың аралығында қалып, өспеуде. Аудан халқының саны 83 мыңнан асып жығылды. Аудан жаңалықтарын біліп отыру, газет оқып, сауаттанып отыру –­­ әр тұрғынның міндетіне айналса, ең болмаса, осы бір газетке жазылып «Өскен өңірдің» санын 10 мыңға дейін арттыруға үлес қосу бақытына кенелсек деймін. Әркімнің өз еркі, дегенмен төл газетімізге қолдау да қажет секілді. Жанымызға қуат, санамызға үлгі-өнеге, отбасымызға жаңалықтар мен қуаныштар алып келетін «Өскен өңір» басылымына жазылуға кешігіп қалмайық. Ол үшін сізге титтей белсенділік, сәл ғана ынта болса болғаны. «Үгітті ұққанға, ақылды жаққанға айт» депті алып жазушы М.Әуезов. Менікі үгіт емес, руханиятқа қарай бет түзеу. Рухымыз сүйікті газетіміз «Өскен өңірді» оқудан бастау алады. «Көру оңай, көреген болу қиын» десек, оның дәрісі – баспасөз, кәдімгі газет, сонымен қатар кітап пен журнал екенін сіздер менен де жақсы білесіздер. Бұқаралық ақпарат құралдарының халыққа сататыны – ақиқат, ал ақиқат дәлелдеуді қажет етпейді. Расында жақсы жазатын авторларды оқи отырып, әдемі сөйлеуге үйренесің, жаның жадырап сүйсінесің. Ол – газет. Ол өңірімізді гүлдетуге үндеп, халқымызды болашаққа ұмтылдырып, рухани дем беріп келе жатқан – «Өскен өңір» басылымы.