БЕС ШАҢЫРАҚТЫҢ ШАТТЫҒЫ ЕСЕЛЕНГЕН КҮН

Отбасы күні Шиелі ауданында 5 сәбидің дүние есігін ашуы – мерекеге келген ең әдемі сый болды. Осы күні ауданда 3 ұл бен 2 қыз өмірге келіп, бес шаңырақтың шаттығын еселеді.
Әрбір сәби – отбасымен қатар елдің де қуанышы. «Бала – бауыр еті, жүректің бөлшегі» дегендей, өмірге келген әр нәрестенің үні – болашаққа бастар ақжолтай үн. Мереке қарсаңында Шиелі ауданы қоғамдық даму бөлімінің «Жастар ресурстық орталығы» КММ-нің тапсырысы аясында «Жалынды жастар» қоғамдық бірлестігінің ұйымдастыруымен аудандық қоғамдық даму бөлімінің басшысы Кенжехан Есенбаев, аудандық Әйелдер кеңесінің төрайымы Нәйлә Палымбет перзентханада болып, жас аналарды қуанышты күндерімен құттықтады. Ақ тілектерін арнап, сый-сияпат табыстады. «Дүниеге сәби әкелу және демографияны көтеру – кез келген мемлекеттің болашағы мен ұлттың сақталып, дамуы үшін жасалатын ең үлкен әрі маңызды іс. Бала тәрбиелеп, оны елдің лайықты азаматы етіп өсіру – үлкен жауапкершілікті, қажырлы еңбекті және шексіз махаббатты талап етеді. Сондықтан бұл іске үлес қосып жатқан әрбір отбасы, әрбір ана ерекше құрметке лайық» – деді К.Есенбаев.