Бір қуаныштысы, көлік саласының мамандары өндірістік жоспарларды орындап қана қоймай, туған өлкесінің гүлденуіне де өз үлестерін қосуда. Олар абаттандыру және көгалдандыру шараларына белсене қатысып келеді. Мысалы, кәсіпорын қызметкерлері «Таза Қазақстан» республикалық экологиялық акциясын белсенді қолдады. Бұл шаралар апта сайын әртүрлі тақырыпқа арналды. «Таза өлке» апталығы аясында елді мекендер маңындағы аумақтарда тазалық жұмыстары жүргізіліп, санитарлық тазалау мен бейберекет қоқыс тастайтын орындар жойылды.

Сонымен қатар «Киелі мекен» апталығында филиал өкілдері ауданның басқа ұйымдарымен бірлесе отырып, Шиелі кентіндегі Ыбырай Жақаев атындағы орталық саябақтың аумағын тазалады. Ал «Жасыл аймақ» апталығында сәндік және жеміс ағаштарының 300-ден астам көшеті отырғызылды. Бұл – кәсіпорын айналасында жасыл аймақ қалыптастыру жолындағы маңызды қадам болды. Бұған қоса, эковолонтерлер қоршауларды, орындықтар мен қоқыс жәшіктерін сырлап, аумақтың көркін келтірді.

Әрине, мұндай экологиялық бастама тек қоршаған ортаны жақсартуға ғана емес, ұжымдық рухты нығайтып, экологиялық мәдениетті қалыптастыруға да ықпал етеді.