Шиеліде кәсібіне адал, еңбегімен ел игілігіне қызмет етіп жүрген құрылысшылар төл мерекесін кең көлемде атап өтті. Кенттегі «Арман» мәдениет үйінде өткен «Берік құрылыс – жарқын болашақ» атты салтанатты жиын – осы салада тер төгіп жүрген майталмандардың еңбегіне берілген зор құрметтің айғағы болды.
Мерекелік жиынға аудан әкімі Айтбай Жандарбеков арнайы қатысып, құрылыс саласы қызметкерлерін кәсіби мерекесімен құттықтады.

– Кез келген елдің экономикалық кұш қуаты мен әлеуметтік тұрақтылығы құрылыстың дамуымен байланысты. Мемлекет басшысы Қасым-Жомарт Тоқаев: «Құрылыс саласында атқарылған әрбір іс – елдің әлеуметтік әлеуетін арттырады, халықтың өмір сапасын жақсартады» – деп атап өткен болатын. Шынында да, құрылысшылардың еңбегі – тек кірпіш қалау немесе қабырға тұрғызу емес, ол – ел болашағына қаланған берік іргетас, халықтың әл-ауқатына қосылған үлес, ұрпаққа қалдырған мұра. Облыс әкімі Нұрлыбек Нәлібаевтың бастамалары мен қолдауының арқасында, ауданда ауқымды құрылыс, жөңдеу және абаттандыру жұмыстары қарқынды жүріп жатыр.

Бүгінде Шиелі өңірі жаңғыру мен жаңару үстінде. Жыл сайын ауданымыздың келбеті көркейіп, құрылыс саласы қарқын алып келеді. 2025 жылы аудан көлемінде республикалық және облыстық бюджеттер есебінен бірқатар ауқымды жобалар жүзеге асырылып, кейбірі ел игілігіне берілді. Атап айтқанда, «Ауылдық денсаулық сақтауды модернизациялау» ұлттық пилоттық жобасы аясында 30 төсектік жұқпалы аурулар бөлімі бой көтеруде. Сонымен қатар №219 Ы. Алтынсарин атындағы мектепке күрделі жөндеу, 200 орындық оқушылар үйі мен 50 орындық өнер мектебінің құрылысы, «Болашақ» дәрігерлік амбулаториясын жаңғырту, көпқабатты тұрғын үйлердің аулаларын абаттандыру мен сыртын қаптау, ғасырлық тарихы бар теміржол вокзалын қайта жаңғырту, «Руханият» орталығы маңынан заманауи субұрқақ пен аллея салу, Дәулеткерей көшесіне қоршау орнату сынды жұмыстар қарқынды жүргізілуде. Сондай-ақ кент пен ауылдық округтердің көшелерін көркейту, инфрақұрылымды жаңарту бағытындағы жобалар да назардан тыс қалған жоқ. Аталған құрылыс нысандарында заманауи құрылыс технологиялары қолданылып, сапаға ерекше мән берілуде. Осы ретте, ел игілігі жолында тынымсыз еңбек етіп жүрген құрылыс мекемелерінің басшыларына – Темірхан Әлімқұлов, Роза Сәдібекқызы, Сұлтан Нұрланұлы, Нұржан Мырзахметов және көптеген білікті құрылысшыларға аудан халқының атынан шынайы ризашылық білдіремін.

Ауқымды құрылыс жұмыстарының арқасында ауданның келбеті, ауылдардың ажары көркейді. Қалай десек те, ел қуанышына айналға ғажайып кешендер мен көрікті үйлердің көптеп салынуына құрыш қолды құрылысшылардың сіңірген еңбектері ерен, – деді аудан басшысы А.Насриддинұлы.

Салтанатты кеште құрылыс саласының ардагерлері мен үздіктеріне түрлі деңгейдегі алғыс хаттар мен марапаттар табысталды.

Атап айтқанда, Қазақстан Республикасы Өнеркәсіп және құрылыс министрлігінің алғыс хатына ие болғандар қатарында Шиелі аудандық ардагер құрылысшылар ұйымының мүшесі, еңбек ардагері – Асылхан Асанов құрылыс саласының ардагері –Тұрмағанбет Жағыпбаров , «Дәнекер құрылыс компаниясы» ЖШС бас инженері – Сабит Қарамұрзаев пен «КНК Кемикал» ЖШС мен «Компания Гежуба Шиелі Цемент» ЖШС өкілдері де марапат төрінен көрінді.

Сонымен бірге Қызылорда облысы әкімінің орынбасары Бақытжан Жахановтың алғыс хаты жеке кәсіпкер, тұрғын үй салумен айналысатын Ерболат Нұрбековке және аудандық құрылыс бөлімінің әдіскері Мұхамеджан Қанайұлына табысталды. Облыстық құрылыс, сәулет және қала құрылысы басқармасының алғыс хатымен марапатталғандар қатарында ардагерлер Әубәкір Мырзабаев, Күләйша Қарекеева, Сейіткамал Дәуітбаев, Валерий Пустынин, Бекболат Тәжібаев, жеке кәсіпкер Руслан Ормағанбетов, құрылыс бөлімінің жетекші маманы Бекжан Нысанов пен «Көшеков» ЖК-нің учаске бастығы Олжас Мәмбетов бар. Ал Шиелі ауданы әкімінің алғыс хатымен ардагер құрылысшылар Кенжебек Құрманбаев, Орынкүл Оржанова, Өмірзак Палжанов сияқты сала майталмандары марапатталып, көпшілік қошеметіне бөленді.

Жиын барысында аудандық ардагерлер кеңесінің төрағасы Өркен Исмаил да құттықтау сөз сөйлеп, құрылысшылардың ел экономикасы мен әлеуметтік әл-ауқатын арттырудағы рөліне тоқталды. Мерекелік шара аудан өнерпаздарының концерттік бағдарламасына ұласып, көрерменге көтеріңкі көңіл-күй сыйлады. Кәсібіне адалдық танытқан құрылысшылардың еселі еңбегі мен қажырлы қызметі лайықты бағасын алып, қоғамның шынайы алғысына бөленді.