Қызылордада үй құрылысы комбинаты жұмысын бастады
Бүгін облыс әкімі Нұрлыбек Нәлібаев Құрылысшылар күні қарсаңында Қызылордада ашылған үй құрылысы комбинатындағы салтанатты рәсімге қатысты.
«Мемлекет басшысы Қасым-Жомарт Кемелұлы Тоқаев Ұлттық құрылтай жиынында «Әділетті Қазақстанда еңбекқор адам ең сыйлы адам болуы тиіс. Маңдай термен тапқан әр тиын – нағыз ардың ісі» екенін айтты. Ал адал еңбек етуді алтын қағидатына айналдырған құрылысшылар қауымын бағалап, лайықты құрмет көрсету – біздің міндетіміз! Темір-бетон бұйымдарын шығаратын зауытты іске қосу аймақтағы құрылыс саласын дамытуға, тұрғын үй және әлеуметтік инфрақұрылым құрылысының көлемін кеңейтуге жол ашады. Мұндай өндірістер бізге құрылыс шығындарын едәуір азайтуға, импортқа тәуелділікті төмендетуге, сондай-ақ капиталдың шет елдерге кетуін шектеуге мүмкіндік береді», – деді аймақ басшысы.
Мерекелік іс-шарада құрылыс саласының ардагері Ақмұрат Мадияров құттықтау сөз сөйлеп, Қызылорда облысының Құрметті азаматы Жарылқасын Шәріпов бата берді.Айта кетейік, үй құрылысы комбинаты еден, жол плитасы, іргетас блоктары, маңдайша, таспалы іргетас, баспалдақ сияқты өнімдер шығарады. Жаңа зауыт сағатына 80 текше метр тауарлы бетон және күніне 120 текше метр темір- бетон бұйымдарын өндіруге қауқарлы. Кәсіпорында 100-ге жуық жаңа жұмыс орны ашылды.
Қызылорда облысы әкімінің баспасөз қызметі
