Кеше аудандық мәдениет үйінде «Өмір. Өнер. Өркен» атты қаламгер, сазгер, қайраткер Өркен Исмаилдың 75 жас мерейтойына арналған шығармашылық кеш өтті. Аудан басшысы Айтбай Жандарбеков қолынан қаламы, иығынан баяны түспеген арда азаматқа ақжарма тілегін айтып, ыстық ықыласын білдірді. Өркен Исмаилдың жастық дәуренінен сыр шертетін прологпен бастау алған кеш, «Шиелім», «Өскен өңірім», «Көктем», «Алдынан терезеңнің жүріп өттім», «Сыр бейнесі», «Жадыра» атты әндерімен жалғасты.

Мерекелік шарада Өркен Әзімханұлына медицина саласының ардагері, қоғам қайраткері Т.Маханов, заң саласының ардагері Қ.Хайруллаев, «Сыр медиа» ЖШС-нің бас директоры М.Аралбаев, №6 кен басқармасы бас директорының орынбасары А. Қайырбекұлы, Шиелі аудандық полиция бөлімі басшысының міндетін атқарушы, полиция подполковнигі Б. Мұхановтар да жылы лебізін білдірді. Шара соңы аудандық полиция қызметкерлерінен құралған «Жалын» хор ұжымының орындауында «Полиция маршы», «Полицейлер көз ілмес», «Ұлы дала ұланымын» әндерімен қорытындыланды.