2023 жылы Шиелі ауданында барлығы 1647 арыз, 45 азаматтық іс түскен. Аталған көрсеткіш 2022 жылмен салыстырғанда 37-ге артып отыр. Сонымен бірге 243 іс бойынша медиация заңы қолданып, тараптардың татуласуына байланысты қысқартылған. Бұл туралы Шиелі аудандық сотының төрағасы Нұржан Бекетаев баяндады.


Аудандық сот төрағасының сөзінше, осы мерзімде 78 адамға қатысты 75 қылмыстық іс қаралып, аяқталған. – Оның ішінде 54 іс бойынша 57 адамға айыптау үкімі, 16 іс бойынша 16 тұлға қылмыстық жауаптылықтан босатылып, іс өндірістен тоқтатылды. 1 адамға қатысты іс сотталушыға іздеу жариялануына байланысты және қосымша 5 іс прокурорға кері қайтырылды. Осы жылға төрт адамға қатысты 4 іс қалдыққа қалдырып, 6 қылмыстық іс бойынша 7 жеке қаулы қабылданды, – дейді аудандық сот төрағасы. Ал бүгінде қоғамның айықпас дертіне айналған сыбайлас жемқорлықтың көрініс беруі тағы да байқалған. Бұл мәселе төңірегінде өткен жылы 2 іс түсіп, 2 адамның қылмысы сотта қаралған. Сонымен бірге есірткі айналымына қатысты 10 іс бойынша 8 сотталушыға айыптау үкімі қабылданып, 2 іс прокуратураға қайтарылған. 57 адамға қатысты тағайындалған қылмыстық іс бойынша 9 адамға айыппұл, 14 тұлғаға бас бостандығын шектеу, ал 31-не бас бостандығынан айыру жазасы тағайындалса, 3 адам тараптардың татуласуына байланысты тағайындалған жазадан босатылыпты. Жеті рет өлшеп, бір рет кесетін сот ісіне деген халықтың сенімін арттыру да олардың – басты мақсаты. Былтыр 1162 адамға қатысты іс қаралған. Аяқталған істердің ішінде 831 іске әкімшілік құқық бұзушылық туралы жаза қолдану қабылданса, 326-сына әкімшілік жауаптылықтан босату және істі өндірістен тоқтату туралы қаулы қабылданыпты. Ал бесеуі біріктірілген. Әлгінде айтқан әкімшілік жаза қолданған 831 адамның 62-іне ескерту жазасы, 443 адамға айыппұл салынса, 313 тұлғаға әкімшілік қамаққа алынып, 10 адам көлік құралын жүргізу құқығынан айырылыпты. 9 талап қою түскен. Түскен 9 істің үшеуі кері қайтарылып, бесеуі медиация туралы келісімге келуге байланысты қайтарылған. Ал біреу қалдықта қалған. – Қайтарылған істерді атап айтқанда, 1 талап қою бойынша іс әкімшілік сот ісін жүргізу тәртібімен қарауға жатпайтындықтан қайтарылса, келесі 1 талап қою ісі осы соттың соттылығына жатпайтындықтан қайтарылды. Қалған 1 талап қою ісі талап қоюшының талабы әкімшілік сот ісін жүргізу тәртібімен қарауға жатпайтындығына байланысты қайтарылып отыр, – дейді Н.Бекетаев.
Сұлушаш МАДИЯРОВА