Облыс әкімі Нұрлыбек Нәлібаевтың Қармақшы ауданы Төребай би елді мекеніндегі тұрғындармен кездесуінде еңбек ардагері Жақсылық Жалғасбаев ауылдық клуб мәселесін көтерді.

«Бізде біраз шаруа атқарылды, дегенмен бір мәселені айтайын. Аудандағы 9 шаруашылықтың бәрінде мәдениет үйі, яғни ауылдық клубы бар, біздің ауылда жоқ. Бәлкім бір жылда шешіле қоймас, бірақ мүмкіндік болса, келешекте осы мәселені назарға алсаңыздар», – деді ақсақал.

«Сіздермен кездесуге келгенде осындай түйткілді мәселелерді шешуіміз керек деп ойлаймын. Мамандарға жаңа жоба жасау жөнінде тапсырма бердім. Сол бойынша құрылыс салуды осы ауылдан бастаймыз. Қазір жоба жасауға бір-екі ай уақыт керек. Тек мәдениет үйі емес, спорт кешенін де бірге саламыз. Сәуір айында бастап, жыл соңына дейін пайдалануға береміз»,– деді аймақ басшысы.

Қызылорда облысы әкімінің баспасөз қызметі