Кенияда су тасқынынан 174 адам қаза тапты
![](https://halyq-uni.kz/cache/imagine/1200/uploads/news/2023/12/21/6583f47b9b1cf383514666.jpeg)
Фото: russian.news.cn
Кенияда нөсер жауын мен су тасқынынан 174 адам қаза тапты.
Синьхуа агенттігінің хабарлауынша, бұл деректі Кения Үкіметінің ресми өкілі Исаак Мваура Найробиде журналистерге берген сұхбатында айтты.
Соңғы үш күнде алты адам көшкіннің астында қалды. Төтенше жағдайларды басқару ұлттық орталығы соңғы оқиғалардың салдарын азайту үшін құзырлы мекемелер мен жергілікті атқарушы органдармен бірлесіп, су тасқыны жағдайын жіті бақылауды жалғастыруда.
Қазан айынан бері Ал-Нино құбылысы тудырған толассыз жауған жаңбыр 47 ауданның 38-іне әсер етіп, қатты су тасқынына әкелген.
Исаак Мваура елдің оңтүстік-шығысындағы Тана өзені аймағы мен Ламу аймағы су тасқынынан ең қатты зардап шеккенін айтты. Бұл аймақтарда төтенше жағдайды жою және халыққа көмек көрсету жұмыстары жалғасуда, – делінген хабарламада.
Кенияның метеорологиялық қызметі қазан айында басталған қалыптан тыс ауа райы 2024 жылдың қаңтарына дейін жалғасады деп болжайды.