Алматыда дизель отынын сатуға шектеу енгізіліп отыр. Бұл туралы Aikyn.kz Алматы қаласы әкімінің баспасөз қызметіне сілтеме жасап хабарлайды.

Алматы қаласында облыс тұрғындары, сондай-ақ транзиттік көлік иелері тарапынан дизель отынына деген сұраныс артты. Бұл тұтыну көрсеткішінің бір мезгілде 30-35%-ға өсуіне түрткі болды.

«Қала тұрғындарын, автобус парктері мен коммуналдық қызметтерді қамтамасыз ету мақсатында жекелеген жанармай құю бекеттеріне дизель отынының шектеулі шығарылымы енгізілді», – делінген ресми хабарламада.

Қазіргі уақытта әкімдік жанар-жағармайды жеткізушілермен бірлесіп мониторинг жүргізіп жатыр.

Алматы қаласына жанар-жағармай үш мұнай өңдеу зауытынан жеткізіледі. Атап айтқанда, Шымкент «Петро Қазақстан Ойл продактс» мұнай өңдеу зауыты (ПКОП үлесі – 40%), Павлодар мұнай-химия зауыты (ПМХЗ үлесі – 35%), Атырау мұнай өңдеу зауыты (АМӨЗ үлесі – 25%).

Айта кетейік, 15 наурыздан бастап Шымкент мұнай өңдеу зауытында күрделі жөндеу жұмысы басталды. Сондықтан Алматы қаласына дизель отынын жеткізу уақытша тоқтатылды. Осы кезеңде ПМХЗ мен АМӨЗ-ден дизель отынын жеткізу шамамен 12 мың тонна болды.
Бүгінде қалада шамамен 8,8 мың тонна дизель отыны бар, 4-5 күн ішінде шамамен 4,7 мың тонна жеткізіледі деген жоспар бар.
Zakon.kz-тің жазуынша, Шымкент мұнай өңдеу зауытында өндіріс қайта басталғаннан кейін жағдай тұрақталады деген үміт бар. Жөндеу жұмысы сәуір айының бірінші онкүндігінде аяқталады.