Өткен сенбіде Қызылорда қаласы Тасбөгет кентінің орталық алаңында Шиелі ауданы мен «Байқоңыр ӘКК» АҚ-ның ұйымдастыруымен ауыл шаруашылығы жәрмеңкесі өтті. Таңсәріден өз жұмысын бастап кеткен кәсіпкерлер бұл жолы да тұтунышыны сапалы өніммен қамтамасыз етті.
Дәл қазір ауылдағы ағайынның ырысы артып, берекесі тасыған кезең. Диқандар ала жаздай еткен еңбегін төкпей-шашпай жиып, қамбаға құйып үлгерді. Өзіміздің көкөніс пен жеміс-жидек те жетеді. Артылғанын аудан асып сату – жылдағы дәстүр.

Сол игі дәстүрден жаңылмаған шиелілік диқандар 45 жүк көлігіне тиелген 120 тоннадан аса өнімдерін облыс орталығына жеткізді. Атап айтқанда, 20 тонна күріш, тура сол көлемде картоп, 5 тонна сәбіз бен 15 тонна пияз, 15 тонна қауын-қарбыз, 20 тонна асқабақ, 18 тонна жеміс-жидек, көкөністер, 5 тонна ет пен балық, 2 тонна сүт өнімдері қалалықтарға ұсынылды.

Жергілікті тұрғындар тарапынан шиелілік өнімдерге сұраныс жоғары болды. Оның үстіне баға да нарықтан 15-20 процент төмен. Әсіресе көпшілік «Шиелі-құстың» жұмыртқасын алуға асықты. Асқабақ пен картоп та ыстық бәліш те өтіп кетті. Алаңға жиналған жұрт арзан азық-түліктен өзіне керегін алып үлгергеніне риза.

Жәрмеңкенің негізгі мақсаты да сол, әлеуметтік маңызы бар азық-түлік ­тауарлары мен бау-бақша өнімдерінің бағасын тұрақтандыру, халықты тиімді бағадағы қолжетімді азық-түлікпен қамтамасыз ету.

Шара барысында Қызылорда тұрғындары мен қонақтары үшін өнерпаздар концерттік бағдарлама қойып, көтеріңкі көңіл-күй сыйлады.

Облыс орталығындағы ауыл шаруашылығы өнімдерінің жәрмеңкесі көптің көңілінен шығып, қалалықтар өз алғыстарын білдірді. Алда ай сайын кезекті жәрмеңке өткізу жоспарлануда.