Естеріңізде болар, басылымның №62 санына аудандық жұмыспен қамту, әлеуметтік бағдарламалар және азаматтық хал актілерін тіркеу бөлімі коммуналдық мемлекеттік мекемесінің бөлім басшысы Ағыбай Төлегеновпен жүргізген сұқбат жарық көрген болатын.
Сұқбатқа арқау болған тақырып – ­облыс әкімінің атынан тағайындалған грант. Айта кетейік, биыл облыс әкімінің атынан сыр бойылық түлектерге 100 грант бөлінді. Оның 10-ы Шиелі ауданына тиесілі.

– Өңірге қажетті мамандықтар бойын­ша 2022-2023 оқу жылдарына аудан бойынша облыс әкімі грантының бөлінісі негізінде үміткерлердің құжаттарын қарадық. Әлеуметтік-тұрмыстық жағдайымен де етене танысып, әлеуметтік көмек тағайындауға студенттерді іріктеу жөніндегі аудандық конкурстық комиссиясының хаттамасына сәйкес ауданда 8 үміткер грант иегері атанды. Тиісінше ЖОО-ғы оқу ақысын төлеуге әлеуметтік көмек тағайындалды, – дейді А.Төлегенов.

Айта кетейік, оның 5-еуі Қорқыт ата атындағы Қызылорда университетіне, 2 түлек «Болашаққа», 1-еуі С.Асфендияров атындағы Қазақ Ұлттық мемлекеттік университетіне түскен.