Жаңа баспана – жақсылық бастауы Өз үйіңе қол жеткізу – жаңа, жарқын өмірдің бастамасы екені анық. Содан болса керек кез келген адам өзіне тиесілі тұрғын үйдің болғанын армандайды. Қазіргі таңда баспаналы болғысы келетін қазақстандықтар әртүрлі мемлекеттік тұрғын үй бағдарламаларына қатыса алады. Соның ішінде баспанаға мұқтаж, төлем қабілеті бар азаматтарға үй сатып алу мүмкіндігін ұсынатын бағдарламалар да жетерлік. Аудан халқы да үй кезегіне тұрып, баспанадан дәмелі болғанымен, біраз уақыт бойы өңірден мемлекеттік бағдарлама арқылы тұрғын үй салынбай келген. Биыл сол олқылықтың орны толғандай. Айтпағымыз – «Нұрлы жер» мемлекеттік тұрғын үй құрылысы бағдарламасы аясында кентке кіре берістен салынған көппәтерлі үйлер. Сондай көппәтерлі үйлердің бірі – «Көкшоқы» мөлтек ауданынан бой көтерген 3 қабатты 18 пәтерлі тұрғын үй. Облыс әкімі сенбі күнгі сапарында құны 176 млн теңгені құрайтын тұрғын үйдің лентасын қиып, тұрғындарға кілтін табыстады. Сонымен қатар жаңа баспанаға ие болған аудан тұрғындарына ізгі ниетін жеткізіп, ақ жарма тілегін айтты.

Айта кетейік, «Көкшоқы» мөлтек ауданынан бой көтерген тұрғын үйге бас мердігер «СМП-Қызылорда» ЖШС-і тарапынан құрылыс-монтаждау жұмыстары жүргізілген. Құрылыстың жер көлемі 1,76 гектар, ал ғимараттың жалпы ауданы 60 шаршы метрді құрайды. 18 отбасының қуанышына себепкер болған шарада 8 баланың анасы ­Марал Дастанова облыс әкіміне алғыс білдіріп, тебіреніске толы сәтімен бөлісті. «Ең алдымен барлық көршілерімді қоныс тойымен құттықтаймын. Баспана – қазіргі таңда әркімнің қолы жете бермейтін бақыт. Дәл қазіргі уақытта қуаныштан толқып, не айтарымды білмей тұрмын. Қуанышымда шек жоқ. Мемлекеттік бағдарламаның аясында беріп жатқан баспанамыз тек бақытқа, қуанышқа толы болсын» деді көпбалалы ана. Содан соң аудан ардагері Жақай Сақбаев қоныс той тойлаушыларға бата беріп, ел игілігі жолындағы игі істерге ризашылығын білдірді.

Көпті алаңдатқан көпір мәселесі шешілді Осы уақытқа дейін ауданда қос жолды темір жол үстінен соғылатын автомобиль көпірі күн тәртібінен түспеген еді. Себебі күнделікті тіршіліктің тынымсыз қозғалысы үшін көпірдің маңызы зор. Сондықтан қандай мемлекет болсын көпір құрылысына аса мән береді. Көпір салудағы ең басты мақсат – көлік кептелісін болдырмау және жол қауіпсіздігін қамтамасыз ету. Біздің ауданда да кептеліс таңсық дүние емес. Аудан бойынша 100 қоғамдық көлік бар болса, оның 70-ке жуығы «Самара-Шымкент» тас жолы бойындағы теміржол өткелі арқылы жүреді. Дәл осы өткелдің үстінен күніне 20-30 шақты пойыз қатынайды. Сонда бір күнде ауданда осыншама рет кептеліс болады деген сөз. Кептеліс бола қалса кезекте тұрған көліктердің де саны артады. Осыдан жүргізушілердің жолға таласып, қашан қарасаңыз да ентелеп жатқанын байқайсыз. Қуаныштысы, аудан тұрғындары бұдан былай мұндай келеңсіздікке кез болмайды. Себебі көпті алаңдатқан көпір мәселесі шешімін тауып, сенбі күні пайдалануға берілді. Жаңа нысанның лентасын облыс әкімі Г.Әбдіқалықова іссапар барысында қиды.

«Шиелі – 20 бекет» учаскесіндегі автомобиль жолы көпірі «Жұмыспен қамту жол картасы» бағдарламасы аясында салынған. Сметалық құны 644 млн 820 мың теңге тұратын жобаны «Стандарт ОИЛ» мекемесі жеңіп алған болатын. Көпір құрылысына 75 маман тартылып, 18 техника жұмылдырылды. Көпірдің ұзындығы 60 метр, ені 11 метр, жолдың жалпы ұзындығы 1,2 км-ді құрайды. Облыс әкімі жаңа көпірдің ашылу салтанатында жаңа нысан тұрғындардың уақытын барынша үнемдейтін және қуантатын маңызды нысан екенін айтып, жергілікті қауымды құттықтады. Жаңа көпірдің ашылу рәсімінде аудандық қоғамдық кеңестің төрағасы Пердәлі Архабаев та өз пікірін білдірді.

– Бүгін Шиелі ауданы үшін үлкен мереке. Көпірдің ашылуын көп жылдан бері күтіп келеміз. Енді міне, ашылу рәсімінің де куәсі болдық. Жаңа көпірдің бой көтеруі талай уақыт күн тәртібінен түспей, маңызды мәселеге айналған еді. Бүгін сәті келіп, 80 мың халықтың арманы орындалып, өткел мәселесі де шешілді. Жаңа жыл қарсаңында пайдалануға берілген көпір құтты, сапарларыңыз сәтті болсын, – деді ауданның «Құрметті азаматы».

Байсындықтардың қуанышы – көгілдір отын Соңғы жылдары елімізде елді мекендерді газдандыру жұмысы қарқынды жүруде. Бұрын от жағып, күл шығарып, әуре-сарсаңға түсетін ауылдар біртіндеп көгілдір отынға қол жеткізуде. Тіпті шиелілік әлеуметтің де әлеуеті жақсарып, бірнеше елді мекен көгілдір отынмен қамтамасыз етілді. Өңір басшылығы да ауыл-аймақтарды газдандыруға баса назар аударып келеді. Бұған дейін ауданда Бидайкөл мен Ы.Жақаев тұрғындары қыстың күні әбігерге түсіп, от жағатын тіршіліктен құтылып, газдың игілігін көріп үлгерді. Енді байсындықтар да отын жарып, көмір тасып, күл шығаратын бейнеттен біржола құтылды. Аймақ басшысы аудандағы іссапар барысында Жаңатұрмыс ауылдық округіндегі Байсын ауылын да қалыс қалдырмай, «Жұмыспен қамтудың жол картасы» бағдарламасы аясында іске қосқан тұрғын үйлерді газға қосу рәсіміне қатысты.

– Бүгін біз аудандағы тағы бір игілікті істің куәсі болғалы тұрмыз. Өздеріңіз білесіздер, бұған дейін жыл сайынғы есепті кездесуде ауыл халқының көтеріп жүрген ең басты мәселесі ауылға көгілдір отын тарту болатын. Міне, бүгін сол мақсатқа қол жеткізіп, табиғи газды салтанатты түрде қосқалы тұрмыз. Құны 204 млн теңге болатын бұл жобаға облыстық бюджеттен қаржы қаралып, Жаңатұрмыс ауылдық округі бойынша мыңнан аса ауыл тұрғындарының қуанышына орай 205 тұрғын үй табиғи газбен қамтамасыз етіледі, – деді Гүлшара Әбдіқалықова.

Шара барысында арнайы қондырғыдан газ алауы жағылып, Жаңатұрмыс елді мекенінің тұрғын үйлері газға қосылды. Өңір басшысы айтулы күнде аудан тұрғыны Р.Мұстафаевтың үйіне барып, газды пайдалану жұмысын көріп, отбасыға береке тіледі.

Айта кетейік, құрылыс-монтаждау жұмысы көктемде басталған жобаға жауапты мекеме «Сапақ» өндірістік кооперативі болған. Құрылыс барысында аталған кооператив «Жұмыспен қамтудың жол картасы» бағдарламасы аясында 25 адамды жұмыспен қамтыған. Газ жүргізу жұмыстарына бас-аяғы 204 575 млн теңге қаржы жұмсалған. Сондай-ақ биыл аудан орталығы 100 процент газбен қамтылған. Ы.Жақаев елді мекенінде 260, Бидайкөл ауылында 210 жеке тұрғын үй көгілдір отынның игілігін көріп отыр. Енді Н.Бекежанов, Ш.Қодаманов, Ақмая, Алғабас елді мекендерінің жұрты үшін де қуанышты хабардың ауылы алыс емес. Әрине, газдың келуі тұрғындарды пеш жағу тауқыметінен арылтып қана қоймайды. Экологиялық ахуалдың жақсаратынын айтпағанның өзінде, ол аймақ экономикасының қарқынды ­дамуына пәрмен берері сөзсіз.

Іссапар соңында облыс әкімі Гүлшара Әбдіқалықова аудан әкімі Қамбарбек Мүбараковқа негізгі басым салалардағы жүйелі жұмыстарды жалғастыруды және халықтың саулығын сақтауға қажетті шараларды қарқынды жүргізуді тапсырды.