Биыл азаттықтың ақ таңы атқанына 29 жыл. Осынау ширек ғасырдың ішінде қазақ елі биік белестерді бағындырып, талай асудан асты. Төгілген қан мен өлмеген жігердің арқасында жеткен ұлы күн әр қазақстандық үшін маңызды. Себебі егемендікке жету қаншалықты қиын болса, оны сақтап тұру одан да қиынырақ. Тәңірден келген осынау тәтті сыйды сақтап қалу үшін қайтпек керек? Әуелі өскелең ұрпақтың санасына азаттықтың өзгеден ерек һәм ұлы ұғым екенін сіңіруіміз қажет. Бұғанасы қатпаған әр бала бейбітшілікті ата-бабаларымыз сан ғасыр бойы армандағанын есінен шығармағаны абзал. Сондай-ақ өскелең ұрпақ атқа қонып, күндіз отырмай, түнде ұйықтамай жаумен тірескен жаужүрек ерлер мен қайсар қыздардың есімін жадында ұстап, солардан үлгі алса артықтық етпейді.
Осы мақсатта сейсенбі күні Б.Қабылұлы атындағы аудандық мәдениет үйінде «Мәңгілік елдің тұғыры – тәуелсіздік» атты салтанатты шара өтті. Салтанатты шараның шымылдығы Қазақсан Республикасының мемлекеттік Әнұранымен түрілді. Содан кейін аудан әкімі Қамбарбек Мүбараков тұрғындарды айтулы мерекемен құттықтап, ізгі ниетін жеткізді. Құттықтау сөзден кейін аудан басшысы бірқатар азаматтарды марапаттады. Тарқатып айтар болсақ, ҚР Президентінің 2020 жылғы 3 желтоқсандағы Жарлығымен бекітілген мемлекеттік наградамен «Байкен-Ю» ЖШС-нің электргазбен дәнекерлеушісі Ж.Мырзалиев, «Ақмая» шаруа қожалығының бас агрономы, төраға орынбасары С.Көбеген, еңбек ардагері, Шиелі аудандық қоғамдық кеңесінің төрағасы П.Архабаев, «Алтын дән Шиелі» шаруа қожалығының төрағасы А.Бердібаев марапатталды. Ал ведомстволық награданы республика бойынша 228 мәслихат хатшыларының арасында жеңімпаз атанған Шиелі аудандық мәслихат хатшысы Б.Сыздық, 3470 мәслихат депутаттарының арасында жеңімпаз болған аудандық мәслихат депутаты Д.Жұмбеков, Е.Жеңсікбаев, Шиелі ауданаралық ауруханасының күндізгі бөлім меңгерушісі Т.Әбдісадық, Ботабай ауылдық клубының меңгерушісі Б.Маханов иеленді. Бұдан бөлек ауданның әлеуметтік-экономикалық жағдайының дамып, өркендеуіне сүбелі үлес қосқан жандарға ауданның «Құрметті азаматы» атағы, аудан әкімінің «Құрмет грамотасы» және облыс әкімінің алғыс хаты табысталды.

Шара соңында аудан өнерпаздары отансүйгіштікке, елжандылыққа баулитын әсем ән шырқап, көрермендердің көңіліне қуаныш сыйлады.