Бұрнағының қылқалам шеберлері талантты жандарды жасыл түспен әрлесе керек-ті. Ойлы оқырман сол бояуға қарап тамсанып, суретшінің шығармасынан не айтқысы келетінін бірден ұғынатын болған. Ал қазір ше? Қазір біздер жасыл түспен тек тұмса табиғатты ғана бейнелейміз. Содан тумысынан талантты, қабілетті адамдардың бет-бейнесі тұмшаланып қалғандай. Дей тұрғанмен, осы бір түйінді «Болашаққа бағдар: рухани жаңғыру» бағдарламасы аясындағы «Қазақстанның 100 жаңа есімі» жобасы тарқатып берген сыңайлы. Осы бір сәтімен жүзеге асқан жобаның арқасында еңбегіне ел сүйсінген қаншама есімдерді жұрт таныды. Сондай жандардың бірі – ­Бауыржан Рақышев.
Тұңғыш Президент күніне орай дүйсенбі күні аудан әкімі Қамбарбек Мүбараков жерлесіміз, Президенттік «Болашақ» бағдарламасының түлегі, «100 жаңа есім» жобасының жеңімпазы, кардиохирург Бауыржан Рақышевті қабылдады. Ресми қабылдау барысында аудан басшысы мыңдаған жанның жүрегіне ота жасап, ажал тырнағынан құтқарған Б.Алдабергенұлына кент тұрғындарының алғаусыз алғысын жеткізді. Мұнымен қоса «Құрмет грамотасын» табыстап, қазақтың қара домбырасын сыйға берді.

Айта кетейік, Бауыржан Рақышев «100 жаңа есім» жобасында 28 мыңға жуық дауыс­ жинап, бес мыңнан астам үміткердің арасында «Медицина» саласы бойынша жеңімпаз атанған. Бүгінде ол жүрек-қан тамыр ауруларының алдын алуға күш салып жүр. Ауыр дертке шалдыққан науқастарды айықтыруда туа, жүре пайда болған жүрек ақауларын, ишемия ауруларын емдеуде алдыңғы қатарлы кардиохирургтардың бірі болып мойындалып отыр. Білікті маман қазіргі күні Алматыдағы А.Н.Сызғанов атындағы Ұлттық ғылыми хирургия орталығындағы кардиохирургия бөлімінде қызмет етеді.

Өз кезегінде құрмет пен ілтипатқа ие болған кардиохирург аудан әкіміне өз алғысын айтып, естелік суретке түсті.