Абай Құнанбайұлына арналған аудандық шараның ашылуы 31 қаңтар күні Б.Қабылұлы атындағы мәдениет үйінде өтті. Ақынның ән мұрасы өзінің көркемдік құндылығымен заманауи ұлттық өнердің қайнар бұлағына айналды. Оның шығармаларын арқау етіп, қазақ композиторлары әр жанрда бірнеше туындылар жазды. Рухани кеште ақынның өмірінен қысқаша қойылымдар қойып, «Сегіз аяқ», «Домбыраға қол сұқпа», «Өзгеге көңілім тоярсың», «Айттым сәлем, Қаламқас», «Көзімнің қарасы» секілді бірнеше шығармаларын және Абай әндерінен әндесте мен қара сөздерінен қойылымдарды орындап, өлеңдерін оқыған мәдениет саласы қызметкерлері көрерменнің зор ықыласына бөленді.

Шара барысында аудан әкімі Әшім Оразбекұлы шараны салтанатты түрде ашып, ұлы хакім, ойшыл тұлғаның мерейтойының мемлекет мүддесі, халық игілігі жолындағы маңызына тоқтала отырып, аталған шараның Абай Құнанбайұлының өмірін насихаттауда, ұрпақ бойына ұлағат сіңіруде алар орнының ерекше екендігін баса айтып өтті. Ұлы ағартушының туындылары қанша уақыт өтсе де, сахнадан түскен емес. Абай жылының салтанатты ашылуы ерекше өрбіді. Кеш соңында жүрекке жақын, көкірекке жылылық ұялатқан «Желсіз түнде жарық ай» әнін аудан басшысы мәдениет саласы қызметкерлерімен қосыла шырқады.

Абай мұрасы – қазақтың қасиетті қазынасы. Мұның дәлелі аймақта жыл сайын аудандық және облыстық деңгейде «Абай оқуларынан» көркемсөз оқу шеберлерінің байқауы дәстүрлі түрде өткізіліп келеді.

«Біріңді қазақ бірің дос, көрмесең істің бәрі бос» деп айтқан Ұлы Абай атамыздың осы сүбелі сөзі байтақ еліміздің болашағы бірлігінде, халқымыздың татулығында екендігін айқындап тұр. Жүрегі елім деп соққан қазақтың әр азаматы Абай шығармашылығын тану, ұлтының салт-дәстүріне бойлау арқылы өзіне өмірлік ұстаным, рухани азық алады. Сондықтан Абай Құнанбайұлының 175 жылдығына арналған шараны өткізудегі мақсат – елге ұлы ақынның шығармаларын насихаттап, оны оқуға үндеу екені сөзсіз.

Айта кетейік, Ұлы ақынның мерейтойы тек Қазақстанда ғана емес, ЮНЕСКО мен ТҮРКСОЙ ұйымдарына мүше елдер аясында да кең көлемде тойланады.