Аталған шаруа қожалық Шиелідегі ең жас қожалықтың қатарында. Алайда, бір жағадан бас, бір жеңнен қол шығарып жұмыс істеп жатқан ұжымның алған асулары аз емес. Оның ең маңыздысы – шаруашылықтың жыл сайын 1000 гектар жерден өнім алуы. Бүгінде «Байсын» шаруа қожалығында 25 адам жұмыс істейді. Олардың арасында жасы да, жасамысы да бар. Бірақ әрқайсысы өз ісінің шебері атанып үлгерген. Жыл соңында осындай шеберлерді шаруа қожалықтың төрағасы Аятжан Есжанов марапаттады. Осылайша талай жыл жер төсінен талғажау айырып жүрген азаматтардың мерейін үстем етті.

Жылды қорытындылау кешінде ауылдың үлкенді-кішілі тұрғыны тегіс жиналды. Жаңа жылдық көңіл күймен жүрген тұрғындар ән салып, би биледі. Тіпті «Байсын» шаруа қожалығының қолдауымен жаңа жылдық сыйлық та иеленді. Ал шаруа қожалықтың қызметкерлері марапат төрінен көрінді.

Мереке қарсаңында Шиелі индустриалды-аграрлы колледжін тәмамдап, екі жылдан бері шаруашылықтың етжеңді ісімен айналысып келе жатқан жас маман Мұратхан Бәкіртаев пен алты жылдан бері «Класс» комбаинын тізгендеп жүрген Дәурен Шорабаевқа жеңіл көліктің кілті табыс етілді. Ал А.Оразбеков, Е.Тұрсекеев, А.Есжанов және басқа да жұмысшылар жаңа жылдың уағында теледидар иеленді. Мереке күні өзге де қызметкерлер қалыс қалмады. Ұ.Дінисламов пен Б.Шертаев кір машинамен марапатталса, Е.Ербаев, А.Оразбек, Б.Бердібаев қысқатолқынды пештің иегері атанды.

Ақ күріштен тау тұрғызған Ы.Жақаевтың ізбасарлары еңбектен еш қол үзген емес. Міне, жыл соңында алажаздай атыз аралап, маңдайы күнге күйіп, табаны құмға тиген еңбеккерлер абырой биігіне шықты. Бұл иен даланы игеріп, молшылық майданына айналдырған диқандардың соңғы жетістігі емесіне кәміл сенімдіміз.

Маржан БОЛАТҚЫЗЫ