Өскеменде батырлар сайысы өтті. Атақты балуан Қажымұқан Мұңайтпасұлының 150 жылдығына арналған додаға 10 атлет қатысты. Олар салмағы 100 келі болатын қап, бөрене мен тас көтеріп, лом майыстырып, боз кілемде белдесті. Қажымұқан бабамыздың бүгінгі ізбасарлары нағыз мықты екендерін дәлелдеді. Турнирде Ахметкали Салават, Александр Никитин, Максим Осипов жеңімпаз атанды. Қара күш иелері елордада өтетін финалда облыс  намысын қорғайды. Бұл доданы қазақстандық спортшылар одағы ұйымдастырды. Сергей Цырульников, Гиннес рекордтар кітабының рекордшысы, жоба авторы: - Аталған турнир тек спортты ғана насихаттамайды. Біз бұл жарысты даңқты балуан Қажымұқан Мұңайтпасұлының есімін ұлықтауға арнап отырмыз. Яғни турнирге қатысқан әр спортшы осы аты аңызға айналған бабамыздың ерлігін қайталауы керек. Өйткені сайыс түрлері сол кісінің өмірбаянынан алынған. Осылайша өзіміздің өткенімізді, атақты тұлғаларымызды тәрбие көзіне айналдырып, жастарға үлгі етпекпіз.

​https://24.kz​​​