Статистикалық мәліметтерге сүйенсек, жыл сайын жол оқиғалары миллиондаған адамдардың өмірін жалмап, мүгедек етеді екен.
Дүниежүзінде жыл сайын жолда 1,2 млн.-нан астам адам қаза болса, 20-50 млн.адам жарақаттанады. Ал, Қазақстанда жыл сайын 2500 адам қаза болып, 26 мыңы түрлі жарақат алады екен. Бұл – орасан цифр. Салыстыру үшін, егер Ауғанстанда 10 жыл соғыста кеңес әскерлері 13 мың солдат жоғалтса, еліміздің жолдарында соңғы 10 жылда ЖКО-да 26 мың адам қаза болатын көрінеді.
Ауданымызда да дәл осы жағдай. Тұрғындар саны мен көліктің көптігінің әсерінен өткен жылмен салыстырғанда жол көлік оқиғалары мен адам өлімі, жарақат алу көрсеткіштері өсіпті. Өткен жылы 29 жол көлік оқиғасы орын алып, 43 адам әртүрлі жарақат алып, 11 адам қайтыс болса, биыл 41 жол оқиғасы орын алып, 48 кісі жарақаттанып, 12 адам жан тапсырған.
Осы оқыс оқиғалардың алдын алу мақсатында атқарылып жатқан шаралар мен аталмыш дүниежүзілік акция барысында іске асып жатқан іс-шараларды тілге тиек еткен АІІБ-нің қызметкерлері тұрғындарды сақтыққа шақырды. Жол апаттары көбіне жылдамдықты асырғаннан және масаң күйде көліктің тізгінін ұстағаннан болатындығын ескертті. Сондықтан, бұл тек ішкі істер қызметкерлері ғана емес ел болып, ауызбіршілігімізді танытып іске асыратын жұмыс», – деді олар.

«Өскен өңір» ақпарат.