Facebook лайктерге адамның өзі сияқты жауап беретін «тірі профильдер» жасауды жоспарлауда, деп хабарлайды Baq.kz ақпарат агенттігі.

Facebook қолданушылардың басты суреті «Гарри Поттер» әлеміндегі «тірі портреттер» сияқты әрекет ететін жүйені жасап шығармақшы. Фотосуреттер лайктарға жауап ретінде күлімсіреп, қолданушыларға ықыласын білдіретін болады.
Фотосуреттерді «тірілтетін» бағдарламаны Тель-Абив университетінің зерттеушілері жасап шығарған. Әзірше оның жұмысын мінсіз деп айтуға болмаса да, сауалнамаға қатысқандардың жартысы анимацияны адамдардың шынайы эмоциясына ұқсатқан. Ғалымдардың айтуынша, аталған бағдарлама күн өткен сайын жетілдіріле түсуде.
Әлеуметтік желінің алдағы уақытта іске асыруға оқталған жоспарлары бұдан да ауқымды деседі. Болашақта тіпті Facebook-тегі фотосуреттер тек лайктарға қошеметін білдіріп қана қоймай, қолданушылар жіберген хабарламаларға тірі адам сияқты әрекет етпек.