Әнмен шашу шашқан айтулы шараның алғашқы бөліміне 11 әнші қатысты. Ал, қалған 12 өнерпаз келесі бөлімінде бақ сынады. Байқауға облыстық халық шығармашылығын дамыту және мәдени-продюссерлік орта­лығының бөлім басшысы Бағдагүл Есмұрзаева, ҚР мәдениет қайраткері Әшімхан Оспанов және әнші-сазгердің қызы Ақмарал Ноғайбаева әділқазылық етті. Байқау шартында көрсетілгендей Ә.Ноғайбаевтың әндерін нақышына келтіріп орындаған әншілер жүлделі орындармен марапатталды. Облыстық филармонияның әншісі Жарасқан Төлебай бас жүлдені, шиелілік әнші Айгүл Еркінбайқызы бірінші орынды иеленді. Ал, келесі жүлде Салтанат Әбдіғали мен Қалдар Қыдырбекке бұйырды. Шиелілік Рахат Қалкөзов болса үшінші орынды қанжығасына байлады.
Жүлделі орындарды иеленген өнерпаздарды аудан әкімінің орынбасары Тұрмағанбет Жағыпбаров құттықтап, қорытынды сөз сөйледі.