Mamandyq tańdaý – adam ómirindegi eń mańyzdy sheshim. Sondyqtan, bul iske kelgende eskerýdi qajet etetin bir qaǵida bar. Ol – tańdaý bildirip otyrǵan mamandyqtyń bolashaǵyna zertteý júrgizý.
Aitalyq, keleshekte elimizde halyqqa qyzmet kórsetý ortalyqtary (HQKO) bolmaýy múmkin. Óitkeni, qazir turǵyndardyń www.egov.kz portalyna tirkelip, ózderine qajetti qujattarǵa úiden shyqpai-aq qol jetkizýine jaǵdai jasalǵan. Elbasy Nursultan Nazarbaev bul týraly bir sózinde: «Bolashaqta múldem jańa mamandyqtarǵa qajettilik týady. Robottar jumys istei bastaidy. Qazir ǵylym gendi injeneriia men biologiia salasyn damytý úshin jumys isteýde. Ázirge barlyq kompiyterler adam miyn almastyra almaidy. Biraq, jasandy intellekt bar. Barlyq qiyn jumysty kompiyterler men robottar atqarady. Bizdiń mamandyq týraly túsinikterimiz ózgeredi. Sondyqtan, biz qalasaq ta, qalamasaq ta jumys oryndary qysqara bastaidy» degen edi.
Ǵalymdardyń aitýynsha, aldaǵy onjyldyqta joiylatyn mamandyqtardyń qatarynda kitaphanashylar, bilet satýshylar men tiginshiler de bar. Olardyń ornyn jańa mamandar almastyrdy. Máselen, búgingi jol qurylysshylarynyń ornyn «aqyldy jol jóndeýshiler» tolyqtyra túsedi. Ǵaryshqa baratyn joldy retke keltiretin mamandar da paida bolady. Ǵarysh týrizmi damyp, qoǵamda «kosmostyq týrizm menedjeri» qyzmet atqarady. Ol az deseńiz, ortamyzǵa robottardy qashyqtyqtan basqaryp otyratyn neirointerfeister keledi. Robot tehnikasynyń qyr-syryn jetik biletin baǵdarlamashylarǵa suranystyń birneshe esege artatynyna kúmánimiz joq. Oǵan elimizdegi mektepterde qazirden bastap daiyndyq sharalary júrgizilýde. Robototehnika úiirmeleri ashylyp, oqýshylar robot qurastyrýmen qatar injeneriia salasyn da meńgerýde.
Al, medicina salasynda ishtegi balanyń aýrýyn anyqtap, ony ómirge kelmei jatyp emdeýmen ainalysatyn dárigerler paida bolmaq. Jalpy túsingenimiz, endi mamandarǵa óz salasyn jaqsy igerý azdyq etedi, budan bylai olardyń jan-jaqtylyq qabiletteri de sarapqa salynady.
Óz isin, kásibin sheksiz súietin adamnan túbinde jaqsy maman shyǵady. Joǵaryda atap ótken salalarda sizge de óz kúshińizdi baiqap kórer kez keler. Sol sebepti oǵan qazirden bastap daiyndalǵanyńyz jón ekenin aitqymyz keledi.

Juldyzai Noǵaibaiqyzy.