Елбасы Н.Назарбаев: «Бүгінгі күні жалпы адамгершілік құндылықтар кей ретте тоқырауға ұшырай бастағанда «Өзін-өзі тану» бағдарламасы жан-жақты тұлға қалыптастырудың негізгі пәндерінің біріне айналды. «Өзін-өзі тану» нағыз адам болуға, айналадағы әлемді жете тануға және бағалауға, үздік, білімді, ашық болуға, отанға риясыз қызмет етуге баулиды», – деген болатын. «Өзін-өзі тану» бағдарламасы еліміздің барлық мектептерінің оқу бағдарламасына пән ретінде енгізілген еді.
Жуырда Алматы қаласында республикалық «Бөбек» ұлттық ғылыми-практикалық, білім беру және сауықтыру орталығының ұйымдастыруымен «Өзін-өзі тану» пәні бойынша дәстүрлі пәндік олимпиада өткен болатын. Олимпиадада аудан намысын қорғаған №270 Ғ.Мұхамеджанов атындағы орта мектептің 9-сынып оқушыларынан құралған «ЖКЖ» командасы бірінші орынға ие болып, жеңіспен оралды.
Бүгінгі күні біздің елімізде ұлттық және азаматтық құндылық­тар негізінде жеке тұлғаны қалыптастыру және дамыту, жеке адамның рухани күш-қуат мүмкіндіктерін ашу үшін қажетті жағдайлар жасалуда. Рухани-адамгершілік білім беру мақсатында аудан­дық білім бөлімінің әдіскері С.Тілеубергенқызының ұйымдас­тыруымен ауданда 7-9-сыныптар арасында «Қызмет ету қуанышы» тақырыбында «Өзін-өзі тану» пәні бойынша дәстүрлі пәндік олимпиада өткізілген еді. Аталмыш мектептің «Өзін-өзі тану» пәні мұғалімі Фариза Жансейтованың жетекшілігімен 9-сынып оқушысы Дамира Әбибуллаева, Жансая Сейденова, Жұлдыз Әзихан қатысып, аудандағы мектептер арасында бас жүлдеге ие болды. Осылайша, облысқа жолдама алып, жүлделі болған жерлестеріміз республикалық жарыстың төрінен көрінді.

Ж.Нұрғалиева.