Дана халымызда «Адамның бір қызығы бала деген» терең мағыналы сөзі бар. Кез-келген адам өмір бойы жете алмайтын бақыты өзінің ұрпағымен келетініне мән бермеуі мүмкін. Біреу бақытын байлықтан іздесе, біреулер мансап қуып, қызмет жасайды. Ал, адамның негізгі бақыты – өзінің ұрпағы. Ұрпағымен мың жасайтын адам сәбиі дүниеге келгеннен бастап үлкен міндетті мойнына алады. Ол – ұрпақ тәрбиесі. Баланы ұлттық тәрбиеге баулып, бойына адамгершілікті, мәдениетті, инабатты, өз ана тіліне деген құрметті сіңіре тәрбиелеу алдымен ата-ананың, сонан соң өскен ортасының міндеті. Осы ретте тәрбиенің ең үлкен баспалдақтарының бірегейі балабақша десек, артық айт­қандық болмас.
Осы үдеден шығу мақсатында жұ­мыс жасап отырған Ортақшыл ауылындағы «Мадина» шағын орталығы Елбасының «Балапан» бағ­дарламасы аясында өмір­ге келген. Аталған балабақшада бүгінгі таңда қырыққа жуық бала бар.
Орталық қабырғасында әр мереке өз деңгейінде аталып өтіп, тәрбие-тәлімі талап биігінен көрінуде. Балалар асыға күтетін жаңа жыл мерекесі қарсаңында да аталған орталықта «Қош келдің, Жаңа жыл» атты ертеңгілік ұйымдастырылды. Балаларды айрықша көңіл-күйге кенелтіп, шаттыққа бөлеген салтанатты шарада түрлі аңдар мен ертегі кейіпкерлері болды. Кішкентай бүлдіршіндер сол кейіпкерлермен бірге қызықты оқиғалардың куәсі болды. Ерте­гілер әлеміне саяхат жасаған балалар мәз-мейрам болып, жасыл шырша жанында ән айтып, би биледі. Аяз Ата мен Ақшақар балаларға жаңажылдық сыйлықтар таратты.
Өз кезегінде ата-аналар әдемі ертең­­гілік ұйымдастырып, балаларға мерекелік көңіл-күй сыйлап, өнерлі балаларды дайындап, шараның мәнді де мағыналы болып өтуіне үлкен күш салған шағын орталық тәрбиешілері М.Фазыл, Г.Байназар, А.Әбуоваға ри­зашылықтарын жеткізіп, алғыстарын айтты.
Балаларымызды қалай тәрбиелесек, болашағымыз солай болмақ. Келе­ше­гіміздің қожасы балаларымызды білімді де мәдениетті, тәрбиелі де әдепті, кішіпейіл де қарапайым етіп тәрбиелеу өз қолымызда. Олай болса, «Мадина» ұжымына алдағы уақытта тек жемісті еңбек тілейміз.
Д.Жүсіп.