АУДАН БАЛАЛАРЫНЫҢ АЯУЛЫ ДӘРІГЕРІ

Адам өміріндегі ең қастерлі мамандықтардың бірі – дәрігерлік. Әсіресе, бала денсаулығына жауапты педиатрдың жүгі ауыр, жауапкершілігі зор. Себебі әрбір бүлдіршіннің амандығы мен болашағы дәрігердің білімі мен тәжірибесіне тікелей байланысты. Осындай абыройлы қызметті өмірлік мұратқа айналдырып, саналы ғұмырын ұрпақ саулығына арнаған ақ халатты абзал жандардың бірі – Сәуле Исмайлова.
Сәуле Киікбайқызы – 1962 жылдың 25 маусымында Жөлек ауылында дүниеге келген. Жастайынан адам жанына араша болуды армандаған ол мектеп қабырғасынан бастап медицина саласына ерекше қызығушылық танытады. Сол арман жетегінде 1981 жылы Қарағанды мемлекеттік медицина институтының «Педиатрия» факультетіне оқуға түсіп, кейін оқуын Алматы мемлекеттік медицина институтында жалғастырады. 1990 жылы жоғары оқу орнын дәрігер-педиатр мамандығы бойынша аяқтап, ел игілігі үшін еңбек жолына қадам басады.

Жас маман алғашқы еңбек жолын Қызылорда облыстық ауруханасының балалар бөліміндегі интернатурадан бастап, кәсіби шеберлігін шыңдай түсті. 1991 жылы Шиелі аудандық ауруханасының жедел жәрдем бөлімінде дәрігер-педиатр болып қызметке кірісті. Осы кезден бастап оның тағдыры аудан балаларының денсаулығымен біте қайнасып кетті.

Қызмет барысында ол қандай бөлімде еңбек етсе де кәсібіне деген адалдығы мен жауапкершілігін жоғалтқан емес. Реанимация бөлімінде ауыр хәлдегі балалардың өмірі үшін күрессе, балалар бөлімінің меңгерушісі ретінде емдеу сапасын арттыруға күш салды. Бас дәрігердің балалар ісі жөніндегі орынбасары қызметінде ана мен бала денсаулығын қорғау бағытындағы маңызды жұмыстарды үйлестірді. Ал жұқпалы аурулар бөлімін басқарған жылдары ұйымдастырушылық қабілетімен көзге түсіп, халық денсаулығын сақтауда аянбай еңбек етті.

2007 жылдан бастап Шиелі аудандық көп бейінді орталық ауруханасының балалар бөлімін басқарып, зейнет жасына дейін абыройлы қызмет атқарды. Бүгінде зейнеткерлік жасқа жеткенімен, сүйікті мамандығынан қол үзбей, балалар денсаулығы жолындағы еңбегін жалғастырып келеді.

Әріптестері Сәуле Киікбайқызын тәжірибесі мол, білімі терең, талапшыл әрі мейірімді маман ретінде құрметтейді. Ал аудан тұрғындары үшін ол – талай баланың өміріне араша түскен білікті дәрігер. Оның қабылдауында болған ата-аналардың алғысы мен ақ тілегі – ұзақ жылғы еңбектің ең үлкен марапаты. І санатты дәрігер-педиатр ретінде ол кәсіби білімін үнемі жетілдіріп, жас дәрігерлерге тәлімгерлік жасап келеді. Өзінен кейінгі буынға тәжірибесін үйретіп, денсаулық сақтау саласының сапалы кадрлармен толығуына да үлес қосуда.

Сәуле Киікбайқызының көп жылғы адал еңбегі мен жоғары кәсіби біліктілігі мемлекет тарапынан лайықты бағаланып келеді. Дегенмен оның ең үлкен жетістігі – сауыққан балалардың күлкісі, ата-аналардың шынайы алғысы және халықтың сенімі.