Жуырда Б.Қабылұлы атындағы аудандық мәдениет үйінде дәстүрлі әнші, мәдениет қайраткері Бибіажар Махамбетқызының «Қызыма» атты мерейлі ән кеші өтіп, ұлттық өнер мен рухани сабақтастықты дәріптеген тағылымды шара ретінде көпшіліктің ыстық ықыласына бөленді.
Кеш басталысымен-ақ мәдениет үйінің іші ерекше бір рухани толқынысқа толды. Сахна шымылдығы түрілген сәттен бастап көрермен тек концертке емес, аналық мейірім мен перзенттік құрмет тоғысқан өнер әлеміне куә болатынын сезінді. Бұл кештің әр сәті ұлттық өнердің өміршеңдігін айқындайтын шынайы рухани мереке ретінде өрбіді.

Іс-шара барысында аудан әкімі ­Айтбай Жандарбеков құттықтау сөз сөйлеп, Бибіажар Махамбетқызының қазақ мәдениетін дамытуға қосқан еңбегін ерекше атап өтті. Ол Шиелі өңірінің өнер мен руханияттың киелі мекені екенін айтып, өнер иесінің шығармашылығы жас буынға үлгі екенін жеткізді. Сонымен қатар ана мен қыз арасындағы өнер сабақтастығының маңыздылығына тоқталып, қос өнер иесіне шығармашылық табыс тіледі.

Кештің ең әсерлі тұсы – ана мен қыздың сахнадағы рухани үндестігі болды. Бибіажар Махамбетқызының дәстүрлі әндеріндегі терең мағына, ұлттық бояуы қанық әуендер көрерменді бір сәтке өткен мен бүгінді жалғаған рухани кеңістікке жетелесе, оның қызы Қазақстанның еңбек сіңірген қайраткері Ақбота Керімбекова сол өнерді бүгінгі сахна биігімен ұштастырып, көрерменге ерекше әсер сыйлады. Екі буынның өнері бір-бірін толықтырып, ұлттық ән өнеріндегі сабақтастықтың жарқын үлгісін көрсетті.

Сондай-ақ кеш барысында әншілер Индира Елубаева мен Мейрамгүл ­Орашева да сахна төріне шығып, қазақ ән өнерінің көркемдігін айшықтайтын туындыларды орындады. Олардың өнері кештің мазмұнын байытып, көрерменге эстетикалық әсер сыйлады.

«Қызыма» атты ән кеші – тек өнер мерекесі ғана емес, аналық жүректен шыққан мейірімнің, перзенттік құрметтің және ұлттық өнерге деген адалдықтың көркем көрінісі болды. Әрбір орындалған ән мен әрбір сахналық сәт осы бір рухани байланысты тереңдете түсіп, көрермен жүрегінде жылы әсер қалдырды.

Шара соңында аудан жұртшылығы рухани әсерге бөленіп тарқасты. Аталған кеш ұлттық өнердің үзілмес желісі бар екенін, ал сол желінің ең асыл арқауы – ана мен қыз арасындағы өнер сабақтастығы екенін тағы бір мәрте дәлелдеді.