Ұлыстың ұлы күні – Наурыз әрбір елді мекенге ерекше шуақ, айрықша сән-салтанат алып келетіні белгілі. Биыл да көктемнің жаңаруымен бірге келген әз-Наурыз Керделі ауылдық округі үшін мәні мен мазмұны терең, тағылымы мол мерекеге айналды. Бұл ауыл – есімі ел жадында сақталған, жыр мен дәстүрдің көрнекті өкілі Нартай Бекежанов­ атымен аталатын киелі мекен. Сондықтан да мұнда аталып өтетін әрбір мерекенің рухани салмағы ерекше.
Көктемнің алғашқы лебі сезіліп, табиғат қайта түлеген шақта ауыл іші думанға бөленді. Наурыз – тек күн мен түн теңелген мезет емес, ол – адамдардың жүрегін жақындастырып, өткенге тағзым етіп, болашаққа үміт артатын ұлы мереке. Осындай мәні терең күнде Керделі жұртшылығы ұлттық салт-дәстүрді дәріптеп, бірлік пен ынтымақтың жарқын үлгісін көрсетті.

Ауыл төріне арнайы келген аудан әкімі Айтбай Жандарбеков, ардагерлер кеңесінің төрағасы Өркен Исмаил және ақсақалдар кеңесінің төрағасы Исабек Байкенжеев бастаған зиялы қауымның келуі осы күннің мәртебесін асқақтатып жіберді. Олардың әрбір сөзі – өткеннің өнегесі, бүгіннің бағдары, ертеңнің аманаты іспетті. Сахна төрінде айтылған әрбір тілек, берілген әрбір алғыс – еңбектің еленгенінің, елге қызмет етудің қадірі жоғалмағанының белгісі еді. Салтанатты жиын барысында елге еңбегі сіңген азаматтарға аудан әкімінің алғыс хаты табысталып, олардың қоғамдағы орны мен еңбегі лайықты бағаланды. Алғыс хат табысталған сәтте көпшіліктің жүзінен ризашылық пен мақтаныш қатар сезілгендей.

Одан кейін ән шырқалып, би билеп, ұлттық өнердің мәйегі көпшілікке ұсынылды. Әрбір орындалған ән мен әрбір қимыл – қазақтың бай мәдениеті мен рухани мұрасының көрінісіндей әсер қалдырды. Ал Наурыздың басты нышандарының бірі – Наурыз көже де дайындалып, ауыл тұрғындары мен қонақтарға ұсынылды. Бірлік пен ырыстың, молшылық пен берекенің белгісіне айналған бұл тағам көпшіліктің басын бір дас­тархан басына біріктірді. Бұл – «дәм-тұз ортақ» деген ұғымның терең мәнін ұқтыратын, адамдар арасындағы сыйластықты арттыратын игі дәстүр.

Керделі ауылында өткен ұлық мереке – тек бір күндік думан емес, ол – халықтың рухани жаңғыруының, ұлттық құндылықтарға деген құрметінің көрінісі. Мұнда өткен әрбір сәт, айтылған әрбір сөз, орындалған әрбір ән – ел бірлігін нығайтып, болашаққа деген сенімді арттыра түсті. Наурыз – жаңару мерекесі. Ол – өткенді ұмытпай, бүгінді бағалап, ертеңге нық қадам басудың символы. Ал Керделіде аталып өткен бұл ұлық мейрам – сол жаңарудың нақты көрінісі, ұлт рухының мәңгілік екенінің дәлелі.