Туберкулездің алдын алу жолдары қарапайым, бірақ тиімді. Алдымен дұрыс тамақтану мен иммунитетті күшейту аса маңызды. Витаминдер мен минералдарға бай, теңдестірілген тамақ организмнің қорғаныш күшін арттырады. Сонымен қатар вакцинация және жыл сайынғы флюорографиялық тексеру – туберкулезді ерте кезеңде анықтаудың басты әдістері. Тамақ және тыныс алу гигиенасын сақтау, яғни қоғамдық орындарда маска пайдалану, қолды жиі жуу, адамдар көп жиналатын жерлерде қауіпсіз қашықтықты сақтау – инфекция таралуын азайтуға көмектеседі. Ауру белгілері байқалған сәтте дәрігерге уақытылы қаралу да маңызды. Ұзаққа созылған жөтел, қақырық, түнде терлеу немесе салмақ жоғалту – туберкулездің алғашқы белгілері болуы мүмкін.

Шиелі ауданында да осы айлық аясында тұрғындарға тегін флюорографиялық тексеру жүргізіліп, дәрігерлік консультациялар мен ақпараттық семинарлар ұйымдастырылуда. Әлеуметтік акциялар арқылы жұқпалы ауруға қарсы ақпараттық материалдар таратылып, халықтың түсінігі мен жауапкершілігі арттырылады. Туберкулезбен күрес – әрқайсымыздың қолымызда. Денсаулығымызға мұқият қарау, алдын алу шараларын орындау және дәрігерге уақытылы қаралу – ең сенімді қорғау жолы. Айлық 24 ақпаннан 24 наурызға дейін жалғасады, осы уақыт ішінде әрбір азамат өз денсаулығына мән беріп, жақындары мен қоғамға жауапкершілікпен қарауы қажет. Бірге дені сау болып, туберкулезге жол бермейік!