«Өмір деген – ұлы сапар осынау, Қиындықтар кезіксе де жасымау» деп жырлаған Мұқағали Мақатаевтың есімі қазақ поэзиясының асыл мұрасына айналғаны белгілі. Оның өлеңдері – әрқашан жүрекке жетіп, әрбір сөзінде терең ой мен сезім жатыр. Мұқағали Мақатаев – ұлтымыздың рухани байлығы, сөзбен әлемді өзгерткен ұлы ақын. Ал сол ұлы ақынның 95 жылдық мерейтойы елімізде биыл ерекше аталып өтілді. Әдебиет сүйер қауым 9 ақпан күні ­«Руханият» орталығында өткен «Жырмен өткен бір ғұмыр» атты әдеби-сазды кеште ақынның есімін тағы бір мәрте еске алып, оның шығармашылығына деген шексіз сүйіспеншіліктерін білдірді.
Кеш барысында ақынның шығармашылығын жаңа қырынан танып, оның мәңгілік поэзиясының әсемдігіне тағы да бір мәрте бойладық.

Туған күнін атап өту барысында кештің жүргізушісі: «Мұқағалидай ұлы ақынның туған күні – біздің халқымыздың, ұлтымыздың мерекесі!» деп, ақынның шығармашылығына деген құрметтің мәнін тереңнен ашып көрсетті. Оның өлеңдері тек заманауи әдебиетте ғана емес, халықтың санасында мәңгілікке қалып, бүгінгі күнге дейін рухани азық болары анық.

Шара барысында көрермендерге Мұқағали Мақатаевтың өз даусымен айтылған өлеңдерінен үзінділер ұсынылды. Ақынның дауысы – жанының айнасы, сөздері – өлеңнің сыры. Өлеңдерін тыңдай отырып, тыңдаушы бір сәтке сол дәуірге, сол сәтке қайта оралғандай күй кешеді. Ол кезде сөздің күші тек әдебиетте ғана емес, сол сөздермен бір жүректің тербелетінін сезесіз. Кеште әрбір өлең, әрбір әннің әуені тыңдаушыларға ақынның өзіндей жақын болып, жүректерге терең әсер қалдырды.

Кеште ақынның өлеңдеріне арнау жазған жас оқырмандар мен көркемсөз оқу клубының мүшелері өздерінің шығармашылықтарын ортаға салды. Бұл сәтте біз ақиық ақынның сөз өнеріне деген құрметтің тек өткен ұрпақпен шектелмей, бүгінгі жас буынның жүрегіне де жеткенін айқын көрдік.

Кеште айтылған өнерлер мен көркем сөздер ақынның шығармашылығына деген құрметтің шексіз екенін көрсетіп, өнердің түрлі салаларында терең із қалдырған Мұқағалидың есімін ұлықтауға өз үлестерін қосты. Бала би ауылдық мәдениет үйінің директоры Талғат Күзенбаев «Фаризажан» әні мен арнауын оқып, көпшілікті ерекше сезіммен тербеді. Алғабас ауылдық кітапханасының оқырманы Азамат ­Кенжешов, Еңбекші ауылдық кітапханасының оқырманы Кәусар Тұрғанбай, Тартоғай ауылдық кітапханасының оқырманы Жанель Әшір және Орталық кітапханасының оқырманы, №270 Ғ.Мұхамеджанов атындағы орта мектебінің оқушысы Балнұр Ниязбекова ақынның өлеңдеріне арнау оқып, жырдың сәнін ашты.

Сондай-ақ «Арман» мәдениет үйінің қызметкерлері – Әшірбек Тінәлиев пен Дәурен Беркімбаев ән орындап, ақынның сөзін әнмен әсемдеді. Нұрдар Қайназаров өз монологымен кешке терең мағына мен әсемдік қосты. Бұл сәттер тыңдаушыларға ерекше әсер беріп, ақынның шығармашылығының мәңгілік екенін тағы да сезінуге мүмкіндік болды.

Ақынның өлеңдері мен шығармашылығын өнердің өзге түрлерімен байланыстыра отырып, Қодаманов ауылдық кітапханасының жанынан ашылған «Жігер» көркем сурет үйірмесінің мүшесі Ұлжалғас Байтұрсынова ақын өлеңдері желісі бойынша салынған сурет көрмесін таныстырып, көрермендерді өлеңді суретпен сөйлететін ерекше туындылармен таныстырды.

Қорытындылай келе, Мұқағали Мақатаевтың 95 жылдығына арналған бұл әдеби-сазды кеш – ақынның шығармашылығын жаңа қырынан түсініп, оның өлеңдеріне деген құрмет пен сүйіспеншілікті бір серпіліспен қайта сезінуге мүмкіндік берді. Аудандық орталық кітапханасының ұйымдастыруымен өткен бұл шара бүкіл қауымға ақынның шығармашылығын тереңірек түсінуге, ақынның өмірі мен жырларынан шабыт алуға зор мүмкіндік сыйлады. Ақынның рухани мұрасы мәңгілік болары анық!