Шиелі ауданында кәсіпкерлікті дамыту бағытындағы бастамалар нәтижесін беруде. Атап айтсақ, жергілікті кәсіпкер Жанар Сұлтанмахмұтқызы брусчатка және бордюр өнімдерін өндіру ісін жолға қойды. Ол «Атамекен» Шиелі аудандық кәсіпкерлер палатасының қолдауымен 1 572 800 теңге көлемінде қайтарымсыз грант алып, қажетті құрал-жабдықтармен қамтамасыз етілді.
Бүгінде өндіріс орнында брусчатканың төрт түрі, бордюрлер және жол жиегіндегі суағарлар шығарылуда. Кәсіпорын төрт адамды тұрақты жұмыспен қамтып, аудан тұрғындарына табыс табуға мүмкіндік беріп отыр.

– Алдағы уақытта өндіріс ауқымын кеңейтіп, өнім түрлерін көбейту жоспарымызда бар. Заманауи техникаларды енгізу арқылы жұмыс көлемін арттырып, қосымша жұмыс орындарын ашуды көздеп отырмыз, – дейді кәсіпкер.

Аталған өндіріс «Атамекен» Шиелі аудандық кәсіпкерлер палатасының тұрақты қолдауында. Палата директоры Бекзатхан Бауыржанұлы кәсіпкерлік нысанға барып, жұмыс барысымен танысып, жоба мемлекеттік қолдаудың нақты нәтижесін көрсетіп отырғанын атап өтті.

– Мұндай жобалар мемлекеттік бағдарламалардың нақты нәтиже беріп жатқанын көрсетеді. Ең бастысы – грант қаржысы мақсатты пайдаланылып, жаңа өндіріс пен тұрақты жұмыс орындары ашылып отыр. Біз кәсіпкерлерге тек қаржылай емес, кеңес беру, сүйемелдеу бағытында да үнемі қолдау көрсетіп келеміз, – деді ол.

Жиделіарық ауылдық округі әкімдігінен Дәурен Оспанов та кәсіпорынның аудан экономикасына қосып отырған үлесін жоғары бағалады.

Сонымен бұл жоба – мемлекеттік қолдаудың сөз жүзінде емес, іс жүзінде жүзеге асып жатқанын дәлелдейтін нақты мысал. ­Жанар Сұлтанмахмұтқызының бастамасы ауданда кәсіпкерлікке жол бар екенін, ал табандылық пен қолдау ұштасса, өндіріс дамитынын айқын көрсетіп отыр. Нақты өнім, нақты жұмыс орны, нақты нәтиже – өңір экономикасының тірегі осындай істер арқылы қалыптасады.