Қызылорданың Тасбөгет кенті өткен сенбіде еңбек мерекесінің лебін сезінді. Шиелі даласының тынысы, тың еңбектің иісі, берекенің дәмі қалаға қарай ағылып келгендей болды. Аудан әкімдігі ұйымдастырған ауыл шаруашылығы өнімдерінің жәрмеңкесі жай ғана сауда алаңы емес, ауыл мен қаланың арасындағы етене байланыстың, ел ішіндегі өзара қолдаудың жарқын айғағына айналды.

Шиелі диқандары бұл жолы да жомарттық танытып, қала жұртына 88 тонна табиғи өнім жеткізді. Сәбиіндей мәпелеп өсірген 20 тоннадан астам Сыр күріші, құнарлы топырақта қуат жинаған 10 тонна бақша өнімі, күннің нұры мен жердің нәрін бойына сіңірген 25 тонна көкөніс, қыстың қамын ескерген 30 тонна картоп, сондай-ақ жаңа сойылған ет пен сүт, тұрмысқа қажет бакалея өнімдері бәрі де ел игілігі үшін бір жерге тоғысты. Ең бастысы, бұл өнімдер нарық бағасынан 10-15 пайыз төмен бағамен ұсынылды. Бұл ауыл шаруашылығы еңбеккерлерінің қала халқына деген шынайы қамқорлығы, «халыққа қолжетімді азық-түлік болсын» деген ниетінің көрінісі. Ал осы игі істі 45 автокөлікке артқан ауыл азаматтары әкелді. Олар үшін бұл табыс алып келетін сауда ғана емес, өз еңбегін елге көрсету, туған жердің өнімін насихаттау. Жәрмеңке алаңында халықтың қарасы қалың болды. Кейбірі баласына сапалы азық алуға келген ана, енді бірі қыстық қорын жасайтын көпбалалы әке, ал біреулері ауылдың табиғи өнімін сағынған қала тұрғыны. Әрқайсысының жүзіндегі қуаныш, көңіліндегі ризашылық ауыл еңбегіне берілген шынайы баға іспетті. Шиеліден жеткен өнімдерге деген сұраныстың жоғары болуы тегін емес. Өйткені ауылдың өнімі – табиғи. Адал еңбекпен, маңдай термен өсірілген, топырақтың иісі сіңген, дәні мен дәруі мол азық. Жәрмеңкедегі қарбалас, қаз-қатар тізілген қаптар мен қораптар, халықтың қыбырлаған тіршілігі – ауылдың ырысы қалаға жеткенін дәлелдей түсті. Бүгінгі экономикалық ахуалда азықтүлік бағасының құбылуы жиілеген шақта мұндай жәрмеңкелердің мәні ерекше. Бағаны делдал емес, тікелей өндіруші белгілеген кезде ғана тұтынушыға тиімді жағдай жасалады. Осы тұрғыдан алғанда, Шиелі ауданының бастамасы бағаны тұрақтандырудың нақты қадамы. Жәрмеңкелер жиі ұйымдастырылса, ол ауыл кәсіпкерлеріне жаңа серпін беріп қана қоймай, қала тұрғындарының да қалтасын қақпайтын тиімді жүйеге айналары анық. Бұл – тұтас өңір экономикасына жұмсақ ықпал ететін оң үрдіс. Тасбөгетте өткен жәрмеңке – тек сауда алаңы емес, әлеуметтік маңызы бар шара. Ауылдың алғысы, қаланың ризашылығы, үлкен мен кішінің ықыласы осы жерде тоғысып жатты. Бір жағында егін даласында ерінбей еңбек еткен диқан, екінші жағында өмірдің қарбаласымен жүріп, табиғи өнімге зәру қала тұрғыны. Оларды жақындатқан өзара түсіністік пен қоғамға ортақ мүдде. Осындай шаралар жиі өткізіліп тұрса, ауылдың еңбегі бағаланып, қаланың қажеттілігі өтеліп, ел ішінде береке арта түседі. Шиелі өнімдерінің Қызылорда жұртшылығына молынан ұсынылуы ауыл шаруашылығының әлеуетін көрсететін, ел ішіндегі ынтымақты айшықтайтын тамаша үлгі. Ауылдың ырысы қаланың ырысына айналғанда ғана жердің берекесі артады. Ал мұндай жәрмеңкелер – сол ырыстың нақты көрінісі.