Туған жердің топырағы таза болса, елдің еңсесі де биік. Табиғаттың тозуы – ұлттың әлсіреуі, ал оны аялау – ел рухының оянуы. Бүгінде экологиялық мәдениет – әр азаматтың өмір салтына айналуы тиіс басты құндылықтардың бірі. Осы мақсатта елімізде қолға алынған «Таза Қазақстан» акциясы халықты қоршаған ортаны қорғауға, табиғатқа жанашыр болуға шақырып келеді.

Осы игі бастаманың жалғасы ретінде Шиелі ауданында кең көлемді жалпыаудандық сенбілік өтті. Бұл күні ауданның түкпір-түкпірінде тазалық жұмыстары қызу қарқын алды. Кент пен ауылдық округтердің тұрғындары, еңбек ардагерлері, жастар мен еріктілер, мемлекеттік мекемелер мен түрлі ұйымдардың қызметкерлері түгелдей бір мақсатта жұмылды. Көшелер мен саябақтар, арықтар мен қоғамдық кеңістіктер ретке келтіріліп, табиғатқа жаңа тыныс берілді. Күздің сарғыш жапырақтары жиналып, тұрмыстық қалдықтар арнайы ­техника көмегімен шығарылды. Бірі қолына тырма, бірі сыпырғыш ұстап, әркім өз ауласынан, өз көшесінен тазалықты бастады. Бірақ бұл сенбілік – жай ғана тазалық жұмысы емес. Бұл – елдің санасын оятатын, экологиялық мәдениетті қалыптастыратын, азаматтық жауапкершілікті арттыратын үлкен қозғалыс. Тазалық – тек айналаны көріктендіру емес, ол – рухтың тазаруы, қоғамның жаңаруы. Шиелі халқының осындай белсенділігі мен ұйымшылдығы – нағыз азаматтық ұстанымның көрінісі. «Туған жердің әр тасын қадірлеу – елге деген сүйіспеншіліктің белгісі» демекші, табиғатты қорғау – елін сүйген әр адамның борышы. Аудан басшылығы да тұрғындарға үндеу тастап, мұндай шаралардың жалғаса беретінін жеткізді. Себебі тазалық бір күндік науқан емес – ұрпақ тәрбиесінің, ұлттық мәдениеттің бір бөлігі болуы тиіс. Қоршаған ортаға қамқорлық жасау – адамзаттың өзіне жасаған жақсылығы. Иә, табиғат – аманат. Біз сол аманатты келер ұрпаққа таза күйінде табыстауға міндеттіміз. Таза жер – таза ойдың, таза қоғамның бастауы. Бір адамның ниеті, бір ауылдың еңбегі – бүтін бір ауданның ажарын ашатыны анық. Бұл өткен сенбілік Шиелі жұртының табиғатқа деген құрметін тағы бір мәрте айқындады. Бұл – бір күндік еңбек емес, мәңгілік мәні бар іс. Себебі тазалық – мәдениеттің өлшемі, рухтың биіктігі, ұлттың болашағы.