Шиелі ауданына қарасты Ортақшыл ауылында 1945 жылдың 10 мамырында дүниеге келген Нәзира Парманқұлова, бүгінде өз ісінің майталманы, қайсарлығы мен қажырлы еңбегі арқылы қоғамда ерекше орынға ие тұлғаға айналды. Оның ғұмыр жолы – білім мен еңбектің арасында үзілмеген байланыс орнатқан, жастарға үлгі боларлық ерлік пен қайратқа толы.

Нәзира апайдың білім алу жолы 1959 жылы басталған. Ортақшыл ауылындағы жетіжылдық мектепті тәмамдап, Қызылорда қаласындағы М.Мәметова атындағы педагогикалық училищеге оқуға түсіп, 1963 жылы оны бітіреді. Артынша Шымкент педагогикалық институтының тарих факультетінде оқып, 1967 жылы үздік дипломды жоғарғы білімді педагог болып шығады. Бірақ оның білім саласындағы жолы тек оқудан басталған жоқ, ол ізденіс пен еңбек жолында үнемі алға жылжыды. 1967 жылы Жаңақорған ауда - ны, Төменарық станциясындағы №153 А.Д.Романов атындағы орта мектепте тарих және қоғамтану пәнінен сабақ бере бастайды. 1969 жылдан туған ауылында ашылған «Ортақшыл» орта мектебінде директордың кластан, мектептен тыс жұмыстарды ұйымдастырушы орынбасары қызметіне ауыстырылады. Бұл кезеңде оның бар күш-жігері балалардың бойында білім мен тәрбие қалыптастыруға арналды. Тек қана педагогикалық жұмыстармен шектелмей, қоғамның әлеуметтік мәселелеріне де белсене араласты. 1985 жылдан 1991 жылға дейін «Қазақстанның ХХХ жылдығы» кеңшарының партия комитетінің хатшысы қызметін атқарған Назира Парманқұлованың еңбек жолы қоғамның барлық саласында еңбек етуді талап етті. Оның адал қызметі ауданның дамуына айтарлықтай үлес қосып, жылдар өткен сайын есімі ел аузында қалды. 1994 жылы Жөлек ауылдық округіне, кейін Ортақшыл ауылдық округіне әкім болып тағайындалуы оның саяси қызметінің жаңа кезеңін ашты. Ел басқарудың әр саласында аянбай еңбек еткен Нәзира Парманқұлова халықтың қажеттілігіне сәйкес, ең қажетті шешімдер қабылдап, қоғамда әділдік пен тәртіп орнатуға барын салды. Ол әкімдік қызметте жүріп, ауыл тұрғындарының жағдайын жақсартуға, әлеуметтік мәселелерді шешуге белсене қатысты. Оның еңбегі ел тарапынан лайықты бағаланып, түрлі мемлекеттік марапатпен әрдайым қошеметтелді. «Қазақстан халық ағарту ісінің үздігі» төсбелгісі, «Қызылорда облысына 70 жыл» , «Еңбек ардагері» медалі, бірнеше алғыс хаттар мен құрмет грамоталары – оның қажырлы еңбегінің айғағы. Назира апайдың есімі көптеген республикалық және облыстық іс-шарада еленіп, ол үнемі білім саласындағы үздік тәжірибелермен бөлісіп отырды. Павлодар қаласында өткен республикалық педагогикалық оқуда І орын иеленіп, өзінің білім беру әдістемелерімен Қазақстанның үздік мұғалімдерінің қатарынан табылды. Нәзира апайдың бүкіл өмірі – ол ізгілік, еңбекқорлық және өз ісіне адалдықтың үлгісі болып табылады. Әрбір жетістігі – оның жүрегінің тазалығы мен еңбекқорлығын паш етеді. Ол білім беру мен қоғамды дамыту саласындағы аса құрметті тұлға ғана емес, жас ұрпақтың дұрыс бағытта өсуі үшін аянбай еңбек еткен шынайы жанашыр. Бүгінде еңбек демалысына шыққанымен, оның бойындағы жанып тұрған рух, ішкі күшқайраты мен жанашырлығы әлі де өзгелерге үлгі болып келеді. Нәзира Парманқұлова сияқты тұлғалардың өмір жолы бізге тек еңбек ету мен білімнің құндылығын көрсетіп қана қоймай, солар арқылы қоғамның дамуына зор үлес қосуға болатынын дәлелдейді. Кейіпкердің өмірі – өз халқы үшін аянбай еңбек еткен адам жанының сұлу образын, табандылық пен батылдықты, білім мен тәртіптің арасында байланыс орнатқан асыл жанның бейнесін сомдайды.