Тәлімді тәрбие отбасынан басталса, дені сау ұрпақ – ұлт болашағы болмақ. Ата-ана шаңырақтың іргетасы. Сондықтан, бала өмірінде салауатты өмір салтын қалыптастыруда әке мен ананың рөлі орасан зор. Жуырда №159 Еңбекші орта мектебінде жалпы ата-аналар комитетінің және Еңбекші ауылдық әйелдер кеңесінің төрайымы Ұ.Батишованың бастамасымен 3 «ә» сыныбы ата-аналар арасында «Толағай» отбасылық сайысы өтті.
Кіл мықтылар жиналған сайысқа Шиелі аудандық әйелдер кеңесінің төрайымы Н.Палымбетова, Шиелі ауданы Ы.Жақаев атындағы күріш өсіру тарихи музейінің директоры Қ.Ыханова төрелік етті. Сан түрлі кезеңнен сүрінбей өтіп, отбасындағы ауызбіршілік пен спортқа деген қызығушылығын таныта білген топ оза шауып, жеңіс тұғырынан көрінді. Нақтырақ тарқатсақ, бас жүлде «Қыдырбай» отбасына бұйырды. Ал І орынды «Шәкір» отбасы, ІІ орынды «Сейтқасым» отбасы қанжығаға байлады. ІІІ орынмен «Амангелді» отбасысы марапатталды. Сайыс жоғары деңгейде өтті.