Тәуелсіздік түсінген адамға ұлы ұғым. Иә, осы бір қасиетті ұғымға қол жеткізу үшін, талай тарландарымыз бен жампоздарымыз жанын құрбан еткені де есімізде. Құдайға шүкір сол бабалар аңсап өткен егеменді елде өмір сүру бақыты біздің тағдырымызға жазылыпты. Кешегі жаугершілік заманда емес, бүгінгідей бейбітшілігі мен тыныштығы сақталған сағатта өмір сүру санасында саңылауы бар адамға көп нәрсені айтпай-ақ түсіндіруі тиіс. Қазақ қашан да, елдің тыныштығын біріншіге қойған халық. Өйтпесе, көптен көрмеген бауырымен «ел-жұртың, ауыл-аймағың аман ба?» деп амандаспас еді. Ал, егер бірліктің парқын түсінбесе, болашақ ұрпаққа «бірлігі жоқ ел тозады, бірлігі күшті ел озады» деп өсиет айтпаған болар еді.
Өткенге көз жүгіртіп, қарап отырсақ Қазақ елі тәуелсіздік алған ширек ғасырдың өзінде талай сын-сағаттарды басынан өткергенін көз көрді. Елдегі экономикалық тұрақтылықты сақтап, халықтың әлеуметтік жағдайын арттыру жолындағы жеткен жетістіктеріміз бен түрлі келеңсіздіктерден өгізді де өлтірмей, арбаны да сындырмай өте білдік. Жетпіс жыл бойына сананы улап келген кеңестік идеологиямен күресу де жалпыға жеңіл болмағаны анық. Ұлттығымыздың темір қазығы тіл, діл, дін секілді асыл құндылықтарымызды қайта оралту жолында да түрлі қиыншылықтардың болғаны рас. Мәселен, екі мыңыншы жылдары бір ғана діннің төңірегінде елдігімізге сызат түсіретін жайттар орын ала бастады. Мысық тілеу миссио­­нерлер мен дін бұзар дүмшелердің жаңбырдан кейінгі саңырау құлақтай қаптап кетуі елдегі тұрақтылық пен тыныштыққа қарсы жұмыс жасады. Әбүйір болғанда құзырлы органдар мен жамағатқа жанұшыра ақиқатты түсіндіру жұмысын адал атқарған діни басқарманың арқасында қаптаған қалың сектадан қазақ жастарын арашалап алдық. Кейіннен белгілі болғандай өздерін пәлен деген «шейхпын» деп таныстырып ғаламтор арқылы жастарға түрлі пәтуә беріп, сабақ үйреткен миссионерлердің, көпшілігі шынтуайтынына келгенде «шейх» емес «фейк» болып шықты. Осыдан-ақ, әлеуметтік желі мен ғаламтордың саясаттың бір шоқпары екенін түсінгендей болдық.
Жақында ҚР Ақпарат және коммуникациялар министрлігінде хабарлағанындай, Астананың Есіл аудандық сотының шешімімен «Қазақстанның демократиялық таңдауы» қозғалысы экстремистік ұйым деп танылды. Бас прокуратура «Қазақстанның демократиялық таңдауы» атты тіркелмеген қозғалыстың заңсыз қызметін анықтады. Қылмыстық табыстарды заңдастыру фактілері бойынша бірқатар еуропалық елдерде Әблязовқа қатысты тергеу жүргізілуде. Ұлыбританияда Лондон қаласының жоғарғы сотының шешімімен Әблязов пен оның сыбайластарынан 4 млрд. АҚШ доллары өндірілді. Осыған қарамастан олар Қазақстан Рес­публикасы Конституциясының талаптарын бұзып, конституциялық құрылысты күштеп өзгертуді насихаттау мен үгіттеу бойынша заңсыз әрекетін жалғастыруда. Интернет желілері, мессенджерлер, сондай-ақ, әртүрлі әлеуметтік топтарға парақшалар таратуда.
Бұл әрекеттер «Экстремизмге қарсы іс-қимыл туралы» заң бойынша саяси экстремизм болып саналады және мемлекеттің қауіпсіздігіне қарсы қылмыс ретінде қудаланады», – делінген бұл орайда бас прокуратураның мәлімдемесінде.
Қазақстанда қазір сыбайлас жемқорлыққа қарсы күрес шаралары жан-жақты жүргізілуде. Ол нәтижесіз де емес. Инфляцияны тежеу бойынша Үкімет пен ұлттық банк тарапынан тиісті шешімдер қабылданып жатыр. Халықара-лық қаржы институттарының, оның ішінде халықаралық валюта қорының болжамы бойынша Қазақстанда өсімнің болмашы деңгейі алдағы 3-4 жылдың бедерінде сақталуы мүмкін. Бұған әлемде болып жатқан әртүрлі жағдайлардың әсері бар. Осыған байланысты әлемдік деңгейде орын алып отырған осындай келеңсіздіктерді пайдаланып, елді бүлінушілікке шақыруды, бірлігімізге сызат түсіруді көздейтін базбір арандатушылық әрекеттерден сақтануымыз қажет. Бұл орайда, ҚР Бас прокуратурасы бұл ұйымға қатысқан немесе қолдау білдіргендер қылмыстық жауапкершілікке тартылатынын да ескертеді.
Осы ретте айтпағымыз, Еуропада тығылып жатып халықты тығырықтан шығарамын деп бөскен Әбіләзовтың құйтырқы әрекетінен аулақ болғанымыз абзал. Өйтпеген жағдайда, «фейкке» айналған шейхтардай Әбіләзовтың да сағымға айналып кетпесіне кім кепіл?

Елдос ЖҮСІП.