Өскен өңір Osken-onir.kz ақпараттық агенттігі
» » ҚАЗАҚТЫҢ ТІЛІ – ҚАЗАҚТЫҢ ЖАНЫ

ҚАЗАҚТЫҢ ТІЛІ – ҚАЗАҚТЫҢ ЖАНЫ

«Шиелі аудандық көпбейінді орталық ауруханасы» ШЖҚ КМК ҚР Тіл туралы заңына байланысты және Мемлекеттік тіл саясатын іске асыру жөнінде аудандағы емдеу және алдын алу ұйымдарында біршама жұмыстар атқарып келеді. Халқымыздың тарихы да, тағдыры да – тілінде. Мәдениеті мен әдебиеті де, діні де – тілінде. Тіл өткен тарихпен ғана емес, бүгін мен болашақты байланыстыратын құрал. Біздіңше, тілдің тұғыры да, тағдыры да бесіктен, яғни отбасынан басталады. Отбасында ана тілінде сөйлеп өскен бүлдіршіннің тілге деген ықыласы терең, құрметі биік болады. Сондықтан да мемлекеттік тілдің мәртебесін көтеру бағытындағы жұмыстарды үздіксіз жалғастыра беруіміз керек.

Тәуелсіздікті тұғырдан түсірмеу үшін қазақ тіліне деген құрметті тоқтатпауымыз қажет. Өйткені тіл бар жерде ұлт бар. Ұлттың ұлт болып қалуы, оның болашағы, мемлекеттің әрі қарай өркендеуі бірінші кезекте оның ана тіліне байланысты. Тіліміз – бірлігіміздің тірегі, халқымыздың ұлттық байлығы. Ана тілін ұлықтап, оның мәртебесін арттырып отырған халықтың егемендігі баянды, тұғыры биік болады. Рас, ана тілдің қасиеті туралы қанша айтсақ та таусылмайды. Туған тілге деген махаббат ешқашан өшпейді. Қандай адам болсын, ой-өрісінің, білімінің, мәдениеті мен рухани дүниесінің қаншалықты екені оның жазған жазуынан, сөйлеген сөзінен де байқалады. «Кісіге қарап сөз алма, сөзіне қарап кісіні ал» деп хакім Абай тегін айтпаған. Ана тілінің мол байлығын игерген, құдіретін түсінген, күшіне тағзым етіп, бас иген адам өзіне де, өзгеге де талап қоя алады, сөзді қалай болса солай қолдануға жол бермейді. Сөз мәдениеті мен өз мәдениетін қатар ұстап, екеуін бірге әлпештеп, қамқор болса, ана тіліне деген сүйіспеншілігі сол болмақ. Демек Тәуелсіз елдің жас ұрпағын парасатты, білімді, іскер, қабілетті, ұлтжанды етіп қалыптастыруда мемлекеттік тіліміздің атқаратын қызметі өте жоғары. Ата-баба мұрасын жалғастыру, оның мәртебесін көтеру мына баршамыздың міндетіміз, борышымыз. Сондықтан өз ана тілімізді ұлықтап, оның мәртебесін арттыруға өз үлесімізді қосайық!
Б.ЖАНШОРАЕВ, «Шиелі аудандық көпбейінді орталық ауруханасы»
ШЖҚ КМК-ның «Әкімшілік» бөлімінің
«Қазақ тілі» қоғамдық бірлестігінің төрағасы,
Қазақ тілі маманы
07 ақпан 2024 ж. 174 0