«Сынықтан басқасының бәрі жұғады» демекші жаһандану деп жар салған заманда барлығы қолжетімді болып кетті. Бұрын тыйым салынған нәрселер қазіргі таңда еш шектеусіз көрсетіліп, жасөспірімдердің санасын улауда. Сондықтан болар қазіргі жас ұрпақтың жасы кіші болғанымен, білетін нәрсесі ересек адамдардан артық. Әрине, олар барлығын ұялы телефоннан естіп, көреді. Тіпті кейбіреулері зиянды затқа әуестеніп, жастық шағына балта шабады. Шыны керек, әлеуметтік желіде баланың кімді тыңдап, нені көріп жүргенін ата-ана жоқтың қасы. Ал кейбір жасөспірімдер басында болып жатқан қиын жағдайды ашылып жақындарына айта алмай жатады. Мұның салдарынан жасөспірімдер қиындықпен күресе алмай, керісінше түпсіз тұңғиыққа батып, опық жейді. Мұның барлығын не себепті қозғап отырмын? Қазіргі таңда жастар арасында зиянды заттарды тұтыну белең алып келеді. Оның ішінде есірткіге әуестері де бар. Әрине, жасөспірімдер мұндай әуестікке біреудің насихат жүргізуімен я болмаса «Бір рет дәмін көргенде тұрған ештеңе жоқ» деген жалаң ақпаратқа алданумен барып жатады. Ақыр аяғында соған тәуелді болып, бас тарта алмайтын жағдайға жетеді. Сол себепті насихат жүргізетін ақпарат құралдары, білім беру ошақтары және мұғалімдер мен ата-аналар барлығы бірлесіп есірткінің адам өміріне деген зиянын, денсаулыққа кері әсерін жиі айтып, насихаттап отыру қажет. Себебі дертке айналған тажал талай адамды тосыннан тосырқатып тастайды. Ол жасты да, кәріні де таңдамайды. Адам қай жерде, қай елде болсын есірткіге бір әуес болса, әрмен қарай есірткі іздеп, есі ауып өзіне кесел келтіреді.

Жалпы адам өмірі өлшеулі екенін барлығымыз білеміз. Бірақ осылай есірткі пайдаланатындар өз қолымен өмірін қысқартып, болашағына балта шауып жатады. Өкініштісі, тәуелсіз елде есірткіге тәуелді болып отыр көбісі. Есірткімен достасқанның аяғы жақсы болмайтынын біле тұра қилы-қилы тағдырға ұшырасып жатамыз. Тіпті есірткі пайдаланатындардың арасында өрімдес жастар да, орда бұзар жасқа келген ер-азаматтар да жетіп артылады. Әрине, олардың ойынша есірткіні пайдалану өмірді керемет етіп өткізу шығар. Бірақ есірткісіз өмірдің әлдеқайда ғажап екені жасырын емес. Есірткі тұтынатын адамдардың болашаққа ұмтылысы, ертеңгі өміріне сенімі, жинаған білімі мен ілімі, тіпті емен-жарқын араласатын ортасы да, оны шын сезіммен жақсы көретін жақындары да болмайды. Барлығы зиянды затқа әуес адамнан аулақ жүруге тырысатыны ақиқат. Ал салауатты өмір салтын ұстанып, жарқын болашаққа қол созатын адам армандарына қол жеткізіп, биікті бағындырады. Оқу-білім үйреніп, күн сайын өзін жаңа қырынан тани бастайды. Әрине, жақсылыққа ұмтылатын адамдардың қасында әрқашан жақсы адам жүреді. Сен өзің қоғамда қалай әрекет етсең, ісің солай жүзеге асады. Жаһандану заманында жаңашылдықтың, білім мен ғылымның жаршысы болу- жастардың міндеті. Бұл тұрғыда «Жас бала жас шыбық секілді. Жас күнінде қалай иіп тастасаң, солай өседі» деген Мағжан Жұмабаевтан асып ештеңе айта алмаймыз. Қазақтың мыңжылдық тарихына көз жүгіртсеңіз, ата-бабаларымыз зиянды затқа әуес болмақ түгілі, есім-сойын да білмейтін еді. Ал ұрпақтары біз ше? Хас батыр қазақ деген рухты елдің ұрпағымыз деп айтуға лайықпыз ба? Ал лайық болсақ ең алдымен өз-өзімізді қолға алып, тек есірткі ғана емес күллі зиянды заттардан аулақ жүрейік. Өз қатарластарымызға және жастарға есірткісіз де ертеңімізді ғажап етіп өткізуге болатынын дәлелдейік.

Еламан Кенжеш, Шиелі ауданы,