Дана Абайдың «адамның бір қызығы бала деген» деген терең мағыналы сөзі бар. Баланы ұлттық тәрбиеге баулып, бойына өнер дарытып, мәдениетті, инабатты етіп тәрбиелеу – алдымен ата-ананың сонан соң өскен ортасының міндеті. Осы ретте баланың өнерлі, өрен болып қалыптасуына көптеген үйірмелердің ықпалы зор. Міне, бүгінгі таңда кішкентай болса да өнерді өн бойына сіңірген жас жеткіншектер жетерлік. Оған жуырда өткен өскелең ұрпақтың тамырына рухани нәр беретін, мәдени дүниетанымдық құндылығы бар балалардың жарқын болашағына жол ашатын «Арман» мәдениет үйінде «Бақытты балалар – бейбіт елдің тірегі» атты есеп беру кеші дәлел.
Біз тамашалаған бұл есеп беру кеші өзге кештерден ерекше өтті. Аталған кешке аудан әкімінің орынбасары А.Есмаханов және кеш қонақтары қатысты. Шараның шымылдығын «Жеті нота» вокалдық хор ұжымы ашып берді. Онда патриоттық әндер, поэзиялық жыр-шумақтары келген қонақтарға керемет көңіл күй сыйлады. Сондай-ақ мың бұралған бишілер биден өрнек салып, кештің көркін аша түсті. Атап айтар болсақ, Тасболат Ысқақовтың «Тойтолғауы, Нұрғиса Тілендиевтың «Көңілді бикеш» күйі күмбірлесе, «Ертегілер елінде» атты сән үлгісі коллекциясы барша көрерменнің ерекше ықыласына бөленді. Ескендір Хасанғалиевтың «Асыл Арман» әні сахнаның сәнін келтіріп, кештің көркін ашты. Одан соң, Меруерт Дүйсебайдың талантты шәкірттері және «Арман» би тобы мың бұрала биледі. Және де «Голд» квартеті мен Дәурен Беркімбаев әуелете ән салып, кешке келген барша қонақтар рухани азық алып, керемет әсерге бөленді. Кеш соңында «Арман» мәдениет үйінің директоры Нұргүл Шәлекеева кешке келген қонақтар мен қатысушыларға жылы лебізін білдірді.