Биыл Ұлы ақын А.Құнанбаевтың 175 жылдығы. Әлемді жайлаған індетке байланысты қазақ елі бұл айтулы күнді өз дәрежесінде тойлай алмай отырғаны өкінішті, әрине. Алайда той тойланбады екен деп ақынның атын естен шығаруға, оның келешек ұрпаққа берер тәлім-тәрбиесін ұмытуға болмайды. Жақында ғана жарияланған Елбасының «Абай аманаты» мақаласының түпкі ойы да осында жатса керек. Тұңғыш Президент аталған мақалада Абайдың кемеңгерлігі мен даналығын тағы бір рет көрсетті.

Н.Назарбаев Абайды ескі мен жаңа қоғамды байланыстырып тұрған алтын көпірге теңеп, өзі де Абай мұрасынан мол тәлім алып келе жатқанын тілге тиек етті. Сондай-ақ өзінің Абайды тануы қай кезден басталғанына жауап берді. Елбасы бұл орайда Абай әлеміне аяқ басқан кезін сонау бесікте жатқан уақытпен байланыстырады. «Ұлы ақынның сөздері бесік тербеген әлдимен бірге құлаққа сіңді десем, асыра айтқандық бола қоймас. Рас, өлең сөзге жүйрік, ел әдебиетіне қанық әжем Мырзабала мен анам Әлжан кішкентай күнімде тіні үзілмеген дәстүрлі тәрбие аясында халқымыздың ертегі, аңыз, қиссаларын жадыма сіңірді. Бұл Абай әлеміне апаратын жолдың бастауы болатын» дейді өз мақаласында Тұңғыш Президент.

Иә, Абайды оқу, оны көңілге тоқу оңай емес. Алайда адамда ынта мен ықылас болса хәкім шығармаларын санаға сіңіру қиынға соқпайды. Міне, Елбасы да осы мәселеге баса назар аударған. Сондай-ақ мақала қазақ елін бірлікке, татулыққа шақырып, Абай атамыздың әр сөзін, әр өсиетін санаға сіңіріп, соған қарай амал жасауымызға үндейді.