– Иә, біз үшін жастар жылы жемісті болды. Талай жас буынның қарым-қабілетін анықтап, олармен тығыз жұмыс істедік. Биыл да, алдағы уақытта да жастармен жұмыс тоқтап қалмайды. Ал еріктілер жылына келер болсақ, биыл жұмысымыз бәсеңдеген жоқ. Тек елде індет тарап, көңілімізді түсіргені болмаса барлық іс-шаралар жоспарлағанымыздай өтуде. Мәселен, биылғы жылдың 9 айлық қорытындысы бойынша жастарға бағытталған 88 шара ұйымдастырылып, оған 3854 жас қамтылды. Орталыққа келіп жүгінген 292 жасқа құқықтық, әлеуметтік, психологиялық кеңестер берілді. Сондай-ақ айтулы күндер де ескерусіз қалмай, ауданның жастарына ұлттың ұлы тұлғаларын насихаттауды алға қойып келеміз. Осы орайда «Тұлғатану» жобасы аясында ауданымыздың құрметті азаматы, «Ерен еңбегі үшін» медалінің иегері П.Архабаевпен «Еңбегі ерек, болмысы бөлек» атты тақырыпта кездесу кеші ұйымдастырылды және А.Құнанбаевтың 175 жылдығына орай «Абай өлеңдері табиғат аясында» атты онлайн сурет байқауы өтті.

– Еріктілер жылына орай волонтерлық жұмысты жастарға насихаттау мақсатында кент және ауылдық округтерде, мектептерде 26 кездесу, түсіндірме жұмысы жүргізілді. Нәтижесінде еріктілердің қатысуымен 23 тазалық акциясы, 23 қайырымдылық акциясы, 19 жалғызбасты қарттарымыздың үйіне барып көмек көрсетілді. Жуантөбе, Еңбекші ауылдарындағы тұрмысы төмен отбасыларға азық-түлік таратылды. Еріктілердің ерен еңбегі әсіресе, індет өршіп тұрған шақта байқалды. Негізі біз Президент жарлығынан кейін «Жомарт жүрек», «Көрікті Шиелі» еріктілер жасағын құрып, бекітілген бес бағыт бойынша жұмысқа кірістік. Соның аясында кенттегі қоқысты тазалап, карантин режимі кезінде жас кәсіпкерлермен біріге ­отыр­­­ып, тұрмысы қиын адамдарға азық-түлік, жеміс-жидек жеткіздік. Тынысы тарылған науқастарға 70-ке жуық оттегі толтырылған баллон апарып, аудан тұрғындарына 500-ден аса бетперде тараттық. Бұл жерде еріктілер азық-түлікке я болмаса басқа да қажетті құралдарға өз қаражатын жұмсамауы мүмкін. Бірақ ерікті болу үшін міндетті түрде ақшаның қажеті жоқ деп ойлаймын. Олар демеушілердің аманатына қиянат жасамай жеткізушілер. Сондай-ақ халықты сақтық шарасын сақтауға шақырып, үгіт-насихат жүргізуі де жанашырлықтың, еріктіліктің бір көрінісі деп білемін.

– Жыл басынан бері халықты жұмыспен қамту орталығына жұмыс іздеуші ретінде 810 жас тіркелген. Оның 584-і жұмыспен қамтудың мемлекеттік қолдау шараларымен қамтылды. Яғни «Еңбек» бағдарламасы аясында тұрақты жұмысқа – 584 жас, мемлекеттік грант – 64 жас, жас­тар тәжірибесіне – 147 жас, әлеуметтік жұмыс орындарына – 63 жас, ақылы қоғамдық жұмысқа – 125 жас қамтылды. Айта кетейін, ауданда мемлекеттік «Дип­ломмен ауылға» бағдарламасы аясында да жұмыс жүргізілуде. Биыл үй кезегіне 266 маман тіркеліп, оның 75-і баспанаға қол жеткізген еді. Соның ішінде 14-29 жас аралығында үй алған жастардың саны – 60.

– Біткен іс бір төбе болғанымен, атқарылар ісіміз аз емес. Алдағы уақытта еріктілердің саны мен сапасын арттыру мақсатында волонтерлық жұмыс туралы семинар-тренинг өткізу ойда бар. Сондай-ақ еріктілерге арнап қыстық форма тіктіріп, жыл соңында үздік волонтерларды бағалы сыйлықтармен марапаттауды жоспарлап отыр­мыз. Ең басты мақсатымыз – жастардың бірлігін нығайту, бос уақыттарын тиімді өткізуіне, шығармашыл жастарды қолдауға арналған «Жастар орталығы» ғимаратын салу.