Ғылым таппай мақтанба
«Дүние де өзі, мал да өзі, ғылымға көңіл бөлсеңіз» деп хакім Абай оқу-білімнің бағасын бір ауыз сөзбен берген. Бүгінде таным көкжиегін кеңейтіп, білім нәрімен сусындауға ешқандай кедергі жоқ. Тіпті білім алу үшін Батысқа беттеп, Америкаға аттанып, Қытайға қадам басқан жастар да жетерлік. Алайда, туған жерде жетістікке жетіп жүрген жас ұрпақ та аз емес. Соның бірі – Дамира Әбибуллаева.Ол қазіргі таңда №46 А.Пушкин атындағы мектеп-лицейінің 10 сынып оқушысы. Жастайынан ғылым-білімге ден қойып, әртүрлі сайыстардан төбе көрсетіп жүрген Дамира жақында «Жылдың жүз үздік ғылыми жобасы» тақырыбындағы республикалық байқаудан жүлделі оралды. Оған жетекшісі Айгүл Мышанованың да қажырлы еңбегі сіңген. Сірә, «Ұстазы жақсының ұстамы жақсы» деген осы шығар.
Ел астанасының төрінде өткен жарыстан жерлесіміз І дәрежелі диплом ғана емес, «Үздік авторлық ғылыми жоба» төсбелгісін иеленді. Сонымен қатар жас ғалымның жобасы республикалық ғылыми жинаққа енді.
«Білімдіге дүние жарық» демей ме қазақ даналығы? Осы орайда байқағанымыз талаптанған жан ғылымға ден қойса алар асуы аз болмайды екен. Олай болса Дамира сынды жас буындардың қатары артып, елдің өркендеуіне өз үлестерін қоса берсін деген тілектеміз.
Маржан БОЛАТҚЫЗЫ
