Өлең-жырды серік еткен
Өткен аптада аудандық орталық кітапханада өршіл ақындығымен, батырлығымен, күйшілігімен халықтың ұлы тұлғасына айналған Махамбет бабамыздың 215 жылдығы аталып өтті. Елдік үшін ерлік жасаған ердің есімін келешек ұрпақ есінен шығармау үшін ұлы тұлғаны бүгінгі ұрпаққа ұлықтау мақсатында ұйымдастырылған шара барысында Махамбеттің өлең-жырлары оқылып, өмірінен қойылымдар қойылды.
Ы.Жақаев атындағы №244 мектеп оқушылары Махамбет бабамыздың өлең-жырларынан көріністер қойып, ақынға арнаған өлең шумақтарын тарту етті. М.Өтемісұлын ұлықтауға бағытталған кештің әсерлі өтуіне аталған мектептің кітапханашысы Рахима Фазылованың да еңбегі зор. Шараны кітапханашы Гүлзира Палымбетова жүргізді. Рух іздеп келген өнер сүйер қауымға серпіліс сыйлаған оқушыларға көрермендер де өз алғыстарын білдірді. Шара соңында белсенді қатысқан оқушыларға алғыс хаттар табысталды.
Азамат Жапбарбергенов