БАЙҚОҢЫРДЫ ГАЗДАНДЫРУ ЖҰМЫСТАРЫ ЖАЛҒАСА БЕРЕДІ

Байқоңырда стратегиялық маңызы зор, ілкімді істер қолға алынғалы отыр. Қазақстан мен Ресей бірлесіп игеріп жатқан айлақты одан әрі дамыту тұрғысынан үлкен мақсат-мүдде тұр. Ресей Федерациясымен жасалған уағдаластықтар аясында кешенді дамытудың стратегиялық бағыттары айқын екеніне Елбасының қой жылындағы Сыр өңіріне сапары барысында да куә болдық. Қос мемлекет иық тіресе, Байқоңырды өнеркәсібі дамыған инновациялық-технологиялық орталыққа айналдыруға уағдаласты. Ал былтыр жұлдызды қалашықта газдандыру жұмыстарының алғашқы кезеңі аяқталып, іске қосылды. Бүгінде қазақстандық бірқатар әлеуметтік нысандар мен көпқабатты тұрғын үйлер көгілдір отынның игілігін көріп отыр. Бұл ғарыш кешеніндегі халықтың әлеуметтік-тұрмыстық жағдайына оң әсер етіп, көптің қуанышына айналды.