9 ақпан – ақиық ақын Мұқағали Мақатаевтың туған күні. Осыған орай Алматыдағы «Зағип және нашар көретін азаматтарға арналған рес­публикалық кітапхана» мен «Кө­мектес» қайырым­дылық қоры бірлесе отырып, зағип оқырмандар арасында республикалық «Мұқағали оқулары» фестивалін өткізді.
Мұқағалидың «Жанарсыз адам келеді» деген өлеңі бар.
«Жанарсыз адам келеді… жанарлы бей­қам тірліктен,
Жанарын даулап, дүниені таяқпен түртіп оятқан» деп аяқталатын осы өлеңінде ақиық ақын зағип жандардың жан толғанысын терең тебіреніспен жеткізе білген.
Зағип және нашар көретін азаматтарға арналған республикалық кітапхана Хан­тәңірінің мұзбалағы Мұқағали Мақатаев­тың өлеңдерін насихаттау арқылы қазақ тілінің мәртебесін арттыруға ден қойып, мүмкіндігі шектеулі талантты жастарды ынталандырып, әдеби шеберлікке баулуды дәстүрге енгізген. Жылда өткізілетін осы әдеби шара биылдан бастап керегесін кеңейтіп, республикалық фестивальге айналыпты.
Алдымен «Мұқағали оқулары» фести­валінің іріктеу кезеңіне 23 үміткер қаты­сып, қорытынды кезеңге жолдама алса, сол он бес өнерпаз 2 аталым бойынша: Мұқағали шығармаларын жатқа айту және ақын сөзіне жазылған әндерді орындау бойынша бақ сынасты.
Мерекелік шараны Мирас Қожахметов жетекшілік ететін «Атамұра» ұлт-аспаптар ансамблі Әбдімомын Желдібаевтың «Ерке сылқым», Нұрғиса Тілендиевтің «Көш ке­руен» күйлерімен ашып берді. «Арман­дастар» вокалды-аспаптар тобы «Есіңе мені алғай­сың», «Сағыныш» атты танымал әндерді орындап, оқырмандарға тамаша көңіл-күй сыйлады.
Мұқағали шығармаларын жатқа айту кезеңі бойынша бірінші жүлделі орынды кітапхана қызметкері Зарина Абдрахма­нова жеңіп алып, «Мұқағали» жур­налының ди­ректоры Жақыпжан Нұр­ғо­жаев таға­йындаған 30 000 теңге ақ­­шалай сый­лықты иеленді. Екінші жүл­делі орынды кітапхана оқырманы Лидия Попова жеңіп алды. 20 000 теңге ақшалай сыйлыққа демеушілік жасаған – «Таңбалы» мемлекеттік тарихи-мәдени және табиғи қорық музейінің директоры Абай Садуақасұлы. Үшінші жүлделі орынды «Армандастар» вокалды-аспаптар тобының мүшесі Светлана Тоқа­баева жеңіп алды. Ол Қазақстанның халық артисі, Мемлекеттік сыйлықтың иегері Досхан Жолжақсыновтың 15 000 теңге ақшалай сыйлығымен және дипломмен марапатталды.
Мұқағали Мақатаевтың сөзіне жазыл­ған әндерді орындау кезеңі бойынша бірінші жүлделі орынды Чайковский атындағы му­зы­калық колледжінің 1-курс студенті Ерхат Тәжібаев Мұқағали Ма­қатаевтың сөзіне жа­зылған, Тұрсынғазы Рахимовтың «Аягөз ару» әнін орындап, Қазақ зағиптар қоғамына қа­рас­ты кәсіп­орын төрағасы Мирас Мейір­бек­ұлы тағайындаған 30 000 теңге ақшалай сый­лық­пен марапатталды. Екінші жүлделі орын­ды Оңтүстік Қазақстан облысы Қазы­ғұрт ауданы Қызылқия аудан­дық мәдениет үйінің әдіскері Рүстем Тайыров Мұқаға­лидың сөзіне жазылған, Шынберген Сүлейме­новтің «Қайран жеңгем» әнімен жеңіп алды. 20 000 теңгелік жүлдеге демеу­шілік жасаған – «Алатау» дәстүрлі өнер театрының дирек­торы, жыршы, термеші Берік Жүсіпов. Шы­ғыс Қазақстан облысы Аягөз ауданынан кел­ген, «Қазақ зағиптар қоғамы қоғамдық бір­лестігі» Аягөз бас­тауыш ұйымының төрайымы Құралай Елшібекова Мұқағали Ма­қатаевтың сөзіне жазылған, Төлеген Мұхамеджановтың «Мен деп ойла» әнін орын­дап үшінші жүлделі орынды жеңіп алды. Оған 15 000 теңгелік ақшалай сый­лық­ты кітапхана директоры Ерлік Әлімқұлов тапсырды. Кітапхана оқыр­маны, ақын Олег Рябуха Мұқағалиға ар­наған өлеңін оқып, «Кө­рермендер көз­айымы» дипломымен мара­патталды, сонымен қатар 5000 теңге ақшалай сыйлықты иеленді. Қал­ған қаты­сушылардың барлығы да республи­калық «Мұ­қағали оқулары» атты зағип жандар ара­сында өткізілген фестивальде өнер көр­сеткені үшін арнайы дипломдармен марапат­талып, 5000 теңге ақшалай сый­лыққа ие бол­ды. «Қазақ соқырлар қоғамы» қоғам­дық бір­лестігінің Алматы филиалы төрайымы Ка­бира Сағидолдақызы 5 өнерпаз – Исатова Мей­рамгүл, Горбачева Ольга, Айшуақова Қапи­за, Қорғанбаева Динара, Ербек Бакиев ақшалай сыйлық тарту етті. Шара соңында рес­публикалық «Мұқағали оқулары» фести­валіне қолдау көрсетіп, демеушілік жасаған. Бақытгүл Қыдырбайқызы, Пархат Азатұлы, Бораш Әлібекұлы тағы да басқа жанашыр­ларға кітапхана директоры Ерлікбай Әлім­құлов алғысхат табыс етті.
Осы шара аясында «Ғасыр ақыны» атты кітап көрмесі ұйымдастырылды.
Елбасы Нұрсұлтан Назарбаевтың «Рухани жаңғыру» бағдарламасы аясында өткен іс-шараға барлығы 107 оқырман қатысып, «Мұқағали оқулары» фестива­ліне халықаралық Жамбыл сыйлығының лауреа­ты, ақын Нұрлан Әбдібек, актер, әнші, Мәдениет қайраткері Ғазизхан Әділханов, «Егемен Қазақстан» газетінің шолушысы Сапарбай Парманқұл, Мәде­ниет қайраткері, композитор, кітапхана жанынан құрылған Ардагерлер кеңесінің төрағасы Мүбәрак Шәкір, «Өнер өрімдері» әдеби-мәдени клубының жетекшісі, ақын Әбетхан Тоқтаған қазылық еткенін айта кеткен жөн.
 
Төреғали ТӘШЕН