Kyzylorda-news.kz. Әйтеке би кентінің тұрғыны Нәби Жидебай Басықара ауылынан бес шақырым жердегі ескі дарияның орнынан алма бақ өсіруді қолға алып, 5 гектар жерге алма, алмұрт және жүзімнің көшеттерін егіп тастады.

«Өткен жылы аукцион арқылы Басықара ауылдық округінен 50 гектар жер алып, көптен ойда жүрген істі бастадым. Мезгілінде үй іргесіне түрлі жеміс-жидектер отырғыздым. Тіпті қайбір жылы 15 түптей жүзімнен бір тоннаға жуық өнім жинағаным бар. Кейін шарбақтан үй тұрғызатын болып, бәрін кесіп тастауға тура келді. Сонымен сырттан жер алып, жеміс-жидек өсіруді қолға алдым», – дейді Нәби Жұмабайұлы.
Иә, арман-мақсаты асқақ адам кез келген қиындыққа қарамастан өз дегеніне жетпей қоймайды. Нәкең былтыр бес гектар алқапқа 200 түп алма, алмұрт, 300 түп жүзім және 20 түп қызыл шие көшеттерін отырғызған. Күш-қайраты мен еңбегіне сенген азамат көшеттерді Түркістан облысының Сарыағаш ауданынан алдырды. Оның айтуынша, алма, алмұрттың бұл сорты қысқа төзімді.
Нәби Жидебайдың ендігі мақсаты – сол алма, алмұрттан мол өнім алу. Қазір ол әр ағашты жеке-жеке қарап, баптап, күтіп жүр. Аталған алма, алмұрт сортының толық жеміс беруіне біршама уақыт керек.
«Қанша еңбек етсең сонша өнім аласың. Барлығы «алма мен алмұртты егіп қойсаң, өзі өсіп, өнім береді» деп ойлайды. Алайда ол олай емес. Әр түп жеміс ағашын балаңа қарағандай күні-түні аялауың керек. Түбін жұмсартып, уақытылы дәрі-дәрмек пен дәруменін бересің. Түрлі кеселден қорғайсың. Минералды тыңайтқыш пен дәрі-дәрмекті өлшемімен бермесең, қуратып, өлтіріп алуың мүмкін. Сөйткенде ғана бейнетіңнің зейнетін көріп, табысқа кенелесің», – дейді бағбан.

Бағбан жеміс ағашына аяқсуды Сырдария өзенінен насос арқылы алып, тамшылату әдісімен суарады. Бұл үшін арнайы аппарат пен қажетті құрал-жабдықтарын алдырды.
“Қолы қимылдағанның аузы қимылдайды” демекші, еңбекқор бағбанның алға қойған мақсаты көп. Оның айтуынша, мемлекет тарапынан қолдау болатын болса, жылыжайда көкөніс өсірумен де айналысу ойында бар.