Медицина мамандарының міндеті

«Амбулаториялық-емханалық қызметі бар Шиелі аудандық орталық ауруханасы» ШЖҚ КМК-ның мәжіліс залында өткен жиында ҚР Президенті Н.Назарбаевтың дәстүрлі Жолдауы сараланды. Бас дәрігер Я.Шорабаев Қазақстан халқы үшін маңыз­ды құжатта айтылған негізгі он міндетке жеке тоқталып, ұлт игілігі үшін жасалар жұмыстарды алға қойғандығын жет­кізді. «Адами капитал – жаңғыру негі­зі» деп аталған Жолдаудың жетінші ба­сымдығындағы тапсырмалар түсіндірілді. Үздік денсаулық сақтау ісін және дені сау ұлтты қалыптастыру үшін медициналық технологиялардың дамуына аса мән берген жөн. «Цифрлы Қазақстан» бағдарламасы шеңберінде толықтай сандық жүйеге кө­шіп жатқандығымыз белгілі. Прези­дент Жолдауында: «Ақпараттық жүйе­лер­ді біріктіру, мобильдік цифрлық қо­сымшаларды қолдану, электрондық ден­сау­лық паспортын енгізу, «қағаз қолдан­байтын ауруханаға» көшу арқылы меди­циналық көмектің қолжетімділігі мен тиімділігін арттыру қажет», – делінген. Осы тапсырмаларды еңсерудегі медицина мамандарының міндеттері айтылды. Басқосу барысында психатриялық және туберкулезге қарсы күрес бөлімінің мең­герушісі, аудандық мәслихат депутаты Н.Әмір, бас дәрігердің бастапқы медициналық көмек жөніндегі орынбасары, мәслихат депутаты Қ.Шәукебаев, емхананың профилактикалық және психологиялық-әлеуметтік көмек жөніндегі бөлім меңгерушісі Г.Оразбекова тарихи құжаттағы нақты тапсырмаларға толықтай тоқталып өтті.
Бас дәрігер Я.Шорабаев халыққа көр­сетіліп жатқан медициналық көмек сапасын одан әрі арттыру және Жолдаудың жетінші басымдығындағы тапсырмаларды орындауға белсене атсалысуға шақырды.

Қ.ХАСАНОВ,
«Амбулаториялық-емханалық қызметі бар Шиелі аудандық
орталық ауруханасы»
ШЖҚ КМК-ның заңгер маманы.