Golden Boy промоутерлік компаниясының басшысы Оскар де ла Хойя Геннадий Головкин мен Сауль «Канело» Альварестің үшінші жекпе-жегі бойынша келіссөздер процесінің басталғанын мәлімдеді, деп хабарлайды inform.kz.
Мексикалықтың жағы айқасты  Лас-Вегаста «Синко де майо» мекересінде демалыс күні өткізуді жоспарлап отыр.
Бұдан бұрын олар «Канелоның» рингке 4 мамырда оралатынын мәлімдеген еді.  «Кеше Головкиннің адамдарымен алдын ала келіссөздер өткіздім. Біз «Синко де майо» мерекесінде үшінші жекпе-жек өткізуді ұсындық. Бұл Лас-Вегаста бокс үшін маңызды дата. Сондықтан, біз келіссөздерді бастаймыз. «Канело» кез келген боксшымен айқасуға дайын. Олардың үшінші жекпе-жегі - жақсы мүмкіндік. Келіссөздер басталды, соңы не болатынын көреміз», - деді Де ла Хойя ESPN Houston радиосына берген сұхбатында.

Еске салайық, GGG мен «Канелоның» алғашқы екі жекпе-жегі Лас-Вегаста өткен еді. Бірінші айқас даулы тең нәтижемен аяқталса, екіншіде төрешілер жеңісті Альвареске берді.